नायक अनमोल केसी आइ–मार्स मोबाइलको ब्राण्ड एम्बेस्डर

काठमाडौं, १८ भदौ । ओपल मल्टिनेशनल कम्पनीले दशैंको छेको पारेर नेपालमा नयाँ मोबाइल लञ्चिङ गर्न थालेको छ । ओपल मल्टिनेशनलले आज पत्रकार सम्मेलनको आयोजना गरी चर्चित नायक अनमोल केसीलाई आइ–मार्स मोबाइलको ब्राण्ड एम्बेस्डरमा अनुबन्धित गरेको छ ।

ब्राण्ड एम्बेस्डरका लागि सम्झौतापत्रमा ओपल मल्टिनेशनलको तर्फबाट अध्यक्ष निरञ्जन श्रेष्ठ र नायक अनमोल केसीले हस्ताक्षर गरेका थिए । ओपल र नायक अनमोल केसीबीच १ वर्षे सम्झौता भएको छ ।

त्यस अवसरमा बोल्दै ब्राण्ड एम्बेस्डर अनमोल केसीले आइ–मार्स मोबाइल सुविधा र गोजीको हिसावले नेपाली समाजमा लोकप्रिय हुने विश्वास व्यक्त गरे । उनले भने, “मैले आइ–मार्स मोबाइलका सबै फिचरहरु हेरें । यसले नेपाली उपभोक्ताको मन जित्ने पक्का छ ।” उनले यो मोबाइल अरुभन्दा आधुनिक र गुणस्तरीय भएको दावी पनि गरे ।

ओपल मल्टिनेशनलका अध्यक्ष निरञ्जन श्रेष्ठले आफनो कम्पनीले आइ–मार्स मोबाइल ब्राण्डलाई नेपाली जनजनमा लोकप्रिय र स्थापित गराउने बताए । उनले यो ब्राण्डको आगमनसँगै प्रत्यक्षरुपमा २ सय र अप्रत्यक्षरुपमा हजारौंले रोजगारी प्राप्त गर्ने दावी गरे । उनले कार्यक्रममा आइ–मार्सका कन्ट्री म्यानेजर ले दशैंताका लञ्चिङ हुने आफ्नो मोबाइल २ हजारदेखि ३० हजार मूल्यमा हुने जानकारी दिए । उनले भने, “आवश्यकताका आधारमा त्योभन्दा बढी मूल्यका मोबाइलहरु भित्राउने छौं ।”

कार्यक्रममा आइ–मार्सका कन्ट्री म्यानेजर सुशील न्यौपानेले आइ–मार्सका मोबाइलहरु अरुभन्दा सस्तो, गुणस्तरीय र आधुनिक भएको बताए । ‘आइमार्सको आफ्नै उत्पादक कम्पनी भएकाले यसका फोनहरु गुणस्तरीय, आधुनिक र सस्तो पनि रहेको दावी गरे ।

दशैंपछि बजारमा आउने आइ–मार्स मोबाइलका हरेक मोडलमा फोरजी टेक्नोलोजी र ३ वटा मोडलमा सिडिएम नेटवर्क क्षमता रहेको जानकारी दिइएको छ । ओपलको आफ्नै उत्पादक कम्पनी भएकाले आइ–मार्सले नेपाली बजारमा राम्रो प्रतिस्पर्धा गर्ने म्यानेजर न्यौपानेको दावी छ ।