नेपाल भ्रमणमा ओली र मोदीको ट्विट संवाद यस्तो छ…

काठमाडौं, २८ वैशाख- प्रधानमन्त्री केपी शर्मा ओलीको निमन्त्रणामा भारतीय प्रधानमन्त्री नरेन्द्र मोदी नेपाल आउन लागेको पूर्व सन्ध्यामा तीनवटा ट्विट गर्न भ्याएका छन् । त्यसैगरी प्रधानमन्त्री ओलीले पनि ट्विटबाटै जवाफ दिइसकेका छन् । दुवैले आ-आफ्नो ट्विटर ह्यान्डलमा नेपाल भ्रमणको विषयमा लेखेका हुन् ।

प्रधानमन्त्री ओलीले समकक्षी मोदीलाई ट्विट मार्फत यस्तो जवाफ दिएका छन्, “नेपाल भ्रमणमा आउन लाग्नुभएका भारतीय प्रधानमन्त्री महामहिम श्री नरेन्द्र मोदीजीको स्वागतमा म प्रतीक्षारत छु । यस भ्रमणबाट दुई देशबीचको आपसी सद्भाव, सहयोग र समझदारी अझ प्रगाढ हुने विश्वाससहित उहाँको ‘सबका साथ–सबका विकास’को भिजन नेपालको विकास यात्रामा सहयोगी हुने अपेक्षा गरेको छु ।”

ट्विटमा मोदीले यस्तो लेखेका छन्, “प्रधानमन्त्री केपी शर्मा ओलीको निमन्त्रणामा म वैशाख २८ र २९ गते नेपाल भ्रमण गर्दैछु । यो भ्रमणले भारतको नेपालसँग मित्रवत सम्बन्धलाई दिँदै आएको उच्चतम प्राथमिकता प्रतिविम्बित गर्दछ । द्विपक्षीय साझेदारी थप मजबुत बनाउने दिशामा प्रधानमन्त्री ओलीसँग म विस्तृत छलफल गर्नेछु ।”

मोदीको दोस्रो ट्विट यस्तो छ, “भ्रमणमा म काठमाडौंबाहेक जनकपुर र मुक्तिनाथ जानेछु । यी तीर्थयात्रा र पर्यटनका दुई गतिशील केन्द्र हुन् । दुई देशलाई बलियो सांस्कृतिक सम्बन्धमा बाँध्ने प्रतीक पनि हुन् ।”

तेस्रो ट्विट गर्दै मोदीले लेखेका छन्, “लोकतन्त्रलाई थप बलियो बनाउँदै र आर्थिक वृद्धिदर हासिल गर्दै नेपाल नयाँ युगमा प्रवेश गरिरहेका वेला नेपाल सरकारको ‘समृद्ध नेपाल सुखी नेपाली’को दृष्टिकोण कार्यान्वयन गर्ने दृढ साझेदारका रूपमा भारत रहनेछ ।”