पाउनुपर्ने साढे २ कराेड अनुदानको रकम पाएनन उखु कृषकले

माधव बेल्वासे । कपिलवस्तु चन्द्रौटा, २ मंसिर । कपिलवस्तुका उखु किसानहरु सरकारले दिने अनुदान नपाए पछि पुनः आन्दोलित भएका छन । आव ०७१।७२ मा सरकारले प्रति क्वीन्टल २५ रुपैयाको दरले दिने भनेपनी अहिलेसम्म नपाउदा किसानहरु आन्दोलित भएका हुन् ।

यसअघि पनि विभिन्न समयमा चरणवद्ध आन्दोलन गरेपनि आश्वासनकै भरमा आन्दोलन स्थगित गरेका किसानहरु फेरी आन्दोलन गर्ने चेतावनी दिएका छन । कपिलवस्तुमा ७ हजार उखु कृषकले सो अनुदान पाउन सकेका छैनन । अन्य जिल्लाका किसानहरुले अनुदानको रकम पाएपनि कपिलवस्तुका किसानले नपाएको उखु कृषक ओम प्रकाश चौधरी बताए ।

करिब ४ वर्ष भन्दा पहिले दिने भनेको रकम अहिले सम्म किन पाउन सकिएन? किसानहरुलाई आश देखाएर नदिनु गलत भएको भन्दै सरकारले किसानहरुलाई तुरुन्तै अनुदान वापत रकम दिनु पर्ने किसानहरुको माग छ । कपिलवस्तुमा मात्रै करिब ढाई करोड रकम किसानहरुले पाउनुपर्ने रहेको र सम्पुर्ण प्रकृयाहरु पुरा गरेर पनि रकम पाउन नसकेको कपिलवस्तु किसान संघका अध्यक्ष अनुपकुमार चौधरीले बताए । पटक पटक सरकारको ध्यानकर्षण गरेपनि अनुदान नपाएको चौधरीको गुनासो छ । सुगर मिलले कागजपत्रमा ढिलाई गर्दा लगाएतका कारण देखाउदै सो रकम नदिएको चौधरीले बताए ।

कपिलवस्तु किसान संघको आन्दोलनका कायर्कक्रमहरु अनुसार मंसिर २ गते आइतवार इलाका प्रशासन कार्यलय मार्फत सम्बन्धित मन्त्रालयलाई ज्ञापनपत्र समेत बुझाएका छन । कृषकले साउन २७ गते देखी धर्ना,अनसन लगाएतका आन्दोलनका कार्यक्रम गरेका थिए । भदौ १ गते कपिलवस्तु प्रमुख जिल्ला अधिकारी विभिन्न आवश्वासन दिदै अनसन कार्यक्रम स्थगित गराएको भएपनि किसानहरुले रकम नपाएपछी आन्दोलन गर्न बाध्य भएको अध्यक्ष चौधरीले बताए ।

शिवराज नगरपालिका वडा न ७ का वडा अध्यक्ष समेत रहेका चौधरीले मंसिर १८ गते सम्म रकम निकासा नभएमा १९ गते बाट पुन अनसन बस्ने चेतावनी दिएका छन । त्यस्तै स्थानिय समाजेवी कृष्णकुमार चौधरीले किसानहरुको जीविको पार्जनको स्रोत नै उखु रहेको भन्दै वाकि रहेको रकमलाई सरकारले छिटै निकासा गर्नुपर्ने बताए । आईतवार ज्ञापन पत्र वुझ्दै इलाका प्रशासन कार्यलय चन्द्रौटा प्रमुख नर बहादुर खड्काले सम्वन्धित मन्त्रालयमा जानकारी गराई रकम निकासाको लागी पहल गर्ने आश्वासन दिएका छन ।