पूर्वराजा ज्ञानेन्द्र तीन दिनदेखि धुलिखेलमा के गर्दैछन् ?

काठमाडौं  कसैलाइ थाहै नदिइ पूर्वराजा ज्ञानेन्द्र शाहको परिवार गत बुधवारदेखि धुलिखेलको रिसोर्ट बस्दै आएको छ ।  बुधबार दिउँसो परिवारसहित सडकमार्ग प्रयोग गरी धुलिखेल पुगेको हो ।

पूर्वराजा धुलिखेलमा आएर बसेको कुनै ‌औपचारिक जानकारी नभएको सुरक्षा निकायले जनाएको छ। पूर्व राजा राज्यले प्रदान गरेको सुरक्षाकर्मीसहित धुलिखेल पुगेका हुन्। पूर्वराजालाई यसबाहेक अन्य सुरक्षा व्यवस्था नमिलाएको जिल्ला प्रहरी कार्यालय काभ्रेका एसपी सहकुल थापाले बताए। ‘औपचारिक जानकारी भएन, त्यसैले थप सुरक्षा प्रदान गरिएको छैन,’ एसएपी थापाले भने।

पूर्वराजा ज्ञानेन्द्र शाह, पूर्वरानी कोमल शाह, पूर्वयुवराज्ञी हिमानी शाह र हिमानीका छोराछोरी रिसोर्टमा रहे पनि पूर्वयुवराज पारस शाह भने छैनन्। बुधबार धुलिखेल पुगेका शाह आइतबार फर्कने कार्यक्रम रहेको पूर्वराजाका सहयोगी फणिराज पाठकले बताए। यसरी शाह परिवार धुलिखेल पुग्नुको उद्देश्य भने आफूलाई थाहा नभएको पाठकले बताए।

देशभर चुनावी माहौल रहेको र केही स्थानमा विस्फोटनका घटनासमेत भइरहेकाले प्रहरीले पूर्वराज परिवारको सुरक्षामा केही ‘सिभिल वाच’ भने गरिरहेको छ। पूर्वराजा शाहले भाइटीकाको दिन आफू जिम्मेवारी लिन तयार भएको प्रतिक्रिया दिएका थिए।