ओलीले मन्त्री बनाएका आलेले दिए देउवालाई विश्वासको मत

नेकपा एमालेका केही सांसदहरुले छापामार शैलीमा गुट परिवर्तन गरेका छन् । उनीहरुले माधव नेपाल पक्षमा लागेर प्रधानमन्त्री शेरबहादुर देउवालाई विश्वासको मत दिएका हुन् ।

देउवालाई मत दिनेमा पूर्ववनमन्त्री प्रेम आले पनि छन् । उनी ओलीको कार्यकालमा वनमन्त्री बनेका थिए । आलेले गुट परिवर्तन गरेको र विश्वासको पक्षमा मत दिने खुलासा रिपोर्टर्स नेपालले गरेको थियो । त्यतिबेला आलेले विज्ञप्ति जारी गरी भ्रामक खबर भनेका थिए ।

यसैगरी, विगतमा नेपाल पक्षमा रहेर ओली समूहमा लागेका केही सांसदहरुले पनि गुट परिवर्तन गरेका छन् । उनीहरुले आज देउवालाई मत दिएका छन् । माधव नेपाल पक्षमा प्रवेश गरी देउवालाई मत दिएकामा तनहुँका सांसद किसान श्रेष्ठ पनि छन् ।

तर, यसअघि नेपाल समूहमा लागेका भीम रावलले सांसद पदबाट राजीनामा दिएका छन् । सुरेन्द्र पाण्डे, गोकर्ण बिष्ट, योगेश भट्टराई, घनश्याम भुसाल, झपट रावल, दिपकप्रकाश भट्टलगायतले मतदान बहिष्कार गरेका थिए ।