‘प्रचण्ड जी र म जन्मजात शत्रु थिएनौ, नाच्न सिकाउनेले आफैले नाचेर देखाउन्: प्रधानमन्त्री ओली

काठमाडौँ,  ५ जेठ ।  नेपाल कम्युनिष्ट पार्टीका अध्यक्ष तथा प्रधानमन्त्री केपी शर्मा ओलीले नेकपाका अर्का अध्यक्ष पुष्पकमल दाहाल प्रचण्डसँग कुनै समय आफूहरुबिच शत्रुता रहेको तर त्यो जन्मजात भने नरहेको बताएका छन् ।

एमाले र माओवादीबिच एकीकरण भएर बनेको नेकपाको संसदीय दलको पहिलो बैठकमा ओलीले आफूहरु दुवैको लक्ष्य देश विकास रहेको र त्यो बाटोमा गतिसाथ हिँड्दा कहिले काहिँ ठोक्किए र झिल्का मात्रै आएको बताए ।

उनले भने, ‘प्रचण्ड जी र म जन्मजात शत्रु थिएनौँ । उहाँको र हाम्रो लक्ष्य उहि थियो, गन्तव्य पनि उस्तै । हामी दुवै गतिमा थियौँ । त्यो गतिमा कहिले काहिँ घर्षण हुँदा झिल्का निस्किएको मात्रै हो । त्यसलाई नै शत्रुताको रुपमा हेरिएको हो । खासमा केही थिएन । मात्रै घर्षण र झिल्का थियो ।’

अहिले आफूहरुले एकता गरेर देशलाई मात्रै नभएर संसारलाई चकित पारेको ओलीले बताए । उनले भने, ‘यो संसारलाई अचम्मित पार्ने काम भएको छ । असाधारण काम गरेका छौँ । केही दिनअघिसम्म पनि एकता हुँदैन भन्नेहरु अहिले चकित परेका छन् ।’

ओलीले नाच्न सिकाउनेले आफैले नाचेर देखाउनु पर्ने र आफूहरुले एकता गरेर विश्वलाई उदहारण दिएको बताए । विश्वमा कम्युनिष्ट फुट्न मात्रै जानेका छन् भन्ने आरोप लागिरहेका बेला आफूहरुले जुटेर गतिलो सन्देश दिएका बताए ।
अब देश विकासका लागि काम गर्नु पर्छ भन्ने आफूहरुलाई थाहा रहेको र त्यहि अनुसार अघि बढ्ने पनि उनले बताए ।