प्रदेश नं. ७ मा चुनावको तयारी पूरा, १ सय ४ मतदानस्थल अति संवेदनशील

८ मंसिर, डोटी । पहिलो चरणको निर्वाचन अन्तरगत निर्वाचन हुने प्रदेश नं. ७ का ४ जिल्लाहरुमा १ सय ४ मतदानस्थल अति संवेदनशील मानिएको क्षेत्रीय प्रशासन कार्यालय, राजपुरले जनाएको छ ।

‘जम्मा ४ सय २५ मतदान स्थलहरु रहेका छन्’, निमित्त क्षेत्रीय प्रशासक शंकर बिष्टले भने, ‘यसमा हामीले १ सय ४ स्थललाई अति संवेदनशील केन्द्रका रुपमा हेरेका छौं ।’

बिष्टले १ सय २३ मतदान स्थलहरुलाई सम्वेदनशील र एक सय ९८ लाई सुरक्षाको दृष्टिले सामान्य मतदान स्थलका रुपमा राखिएको बताए । उनले भने, ‘अति संवेदनशील र संवेदनशील मतदान स्थलहरुमा सामान्य अवस्थामा भन्दा बढी सुरक्षाकर्मीहरु खटाइएको छ ।’

‘हामीले तीन तहको सुरक्षा व्यवस्था मिलाएका छौं’, अनलाइनखबरसँग कुराकानी गर्दै बिष्टले भने, ‘पहिलो घेरामा नेपाल प्रहरी, दोश्रो घेरामा सशस्त्र प्रहरी र तेश्रो घेरामा नेपाली सेना रहनेछन् ।’

उनले आवश्यकता अनुसार घुम्ती सुरक्षा टोली समेत खटाइएको जानकारी दिए ।

उनका अनुसार सबै मतदान केन्द्रहरुमा बिहीबार साँझै कर्मचारीहरु पुगिसकेका छन् भने शुक्रबारदेखि मतदाता परिचय पत्र वितरणको कार्य भइरहेको छ ।

पहिलो चरणको निर्वाचन अन्तरगत परेका बाजुरा, बझाङ, बैतडी र दार्चुला जिल्लाका गरी ४ प्रतिनिधिसभा सदस्य र ८ प्रदेशसभा सदस्यका लागि मंसिर १० गते निर्वाचन हुँदैछ ।

चुनावी प्रतिस्पर्धामा प्रतिनिधिसभाका लागि २० र प्रदेशसभाका लागि ३५ गरी ५५ जना उम्मेदवार चुनावी मैदानमा छन् ।