प्रधानमन्त्रीको निर्देशनपछि डोटीको सुरक्षा व्यवस्था कडा

डोटी, कात्तिक ३० – प्रधानमन्त्री शेरबहादुर देउवा शान्ति सुरक्षाको अवस्था बुझ्न सुदूरपश्चिम भ्रमणमा निस्किएसँगै डोटीमा सुरक्षा व्यवस्था कडा पारिएको छ ।

केही जिल्लाहरुमा उम्मेदवारलाई लक्षित गरी आक्रमण हुन थालेपछि प्रधानमन्त्रीको निर्देशन बमोजिम डोटीमा पनि सुरक्षा व्यवस्था झन् कडा पारिएको जिल्ला प्रहरी कार्यालयले जनाएको छ ।

जिल्लामा अहिलेसम्म सुरक्षा चुनौती नदेखिए पनि उम्मेदवार, उम्मेदवारका परिवार तथा मतदान हुने स्थलको सुरक्षा योजना तयार पारेर कार्यान्वयन भैरहेको डोटीका प्रहरी प्रवक्ता तथा डिएसपी शिवबहादुर सिंहले बताउनुभयो ।

जिल्लाका १ सय ५७ मतदान स्थलमध्ये १० वटा अति संवेदनशील, ३० वटा संवेदनशील र १ सय ७७ वटालाई सामान्य अवस्थामा राखी विभाजन गरी त्यही अनुसारको सुरक्षा व्यवस्था मिलाइएको डिएसपी सिंहले बताउनुभयो ।

उहाँले भन्नुभयो ‘ दलहरूबिचको अस्वस्थ प्रतिस्पर्धा, भौगोलिक विकटतालगायतका कारणले हामीले निर्वाचन क्षेत्रको निर्धारण गरेका छौं, सबै क्षेत्र र ठाउँमा हाम्रो मजबुत सुरक्षा प्रणाली लागु भएको छ, कसैले डराउनु पर्ने अवस्था छैन् ।’

मंसिर २१ गते हुने चुनावका लागि डोटीमा १ हजार ६ सय भन्दा बढी नेपाल प्रहरी र ८ सय ३३ जना म्यादी प्रहरी परिचालित हुनेछन् । त्यस्तै नेपाली सेना सशस्त्र प्रहरीले थप सुरक्षा प्रदान गर्ने छन् ।

जिल्लामा निर्वाचनको समयमा कुनैपनि अबान्छिक गतिबिधि हुन नदिन तथा बिभिन्न दलका कार्यकर्ताहरु बिच हुने झडप सक्न लाई प्रहरीले एक छुट्टै टिम परिचालन गरेको छ । जिल्लामा कार्यरत रहेको राष्ट्रिय अनुसन्धानका कर्मचारीलाई समेत संलग्न राखी प्रहरीले सादा पोसाकमा पर्याप्त मात्रमा सुरक्षाकर्मि परिचालन गरेको समेत डिएसपी सिंहले बताउनु भयो ।

उहाँले थप भन्नु भयो ‘झडप हुने स्थितीको र अन्य निर्वाचन बिथोल्न सक्ने परिस्थिती निम्त्याउने हरुको बारेमा खबर संकलन गर्ने प्रहरी अधिकृतको कमाण्डमा एउटा छुट्टै परिचालन भएको छ,अप्रिय घटना कुनैपनि हालतमा हुन दिन्नौ ।’