कोरोना रोकथामका लागि सरकारले कडाई गरेसँगै जनजीवन प्रभावित

काठमाडौं, ६ चैत्र । सरकारले कोरोना भाइरसको रोकथामका लाग २५ जनाभन्दा बढी जम्मा हुन रोक लगाउने देखि अत्यावश्यक कामबाहेकमा हिंडडुल गर्न रोक लगाएपछि जनजीवन प्रभावित भएको छ । अहिले मानिसहरु विगतमा भन्दा कममात्र सडकमा देखिएका छन् ।

विद्यालयहरु बन्द गरिएका छन् । कतिपय कार्यालयहरुले कर्मचारीलाई घरबाटै काम गर्न भनेका छन् । आवतजावत् पातलिएको छ । मानिसहरु बाटोमा हिंड्दा मास्क लगाएर मात्र हिंडडुल गरिरहेका छन् ।

शहरका मुख्य केन्द्रहरुमा व्यापारिक गतिविधि निकै घटेको छ । पेट्रोल पम्पहरुमा हिजोसम्म लाम बढी देखिएपनि आजबाट सामान्य अवस्थामा आएको छ ।

यसैगरी, सरकारले चैतभर हुने तय गरेका सबै परीक्षा स्थगित गरेको छ । एसईई परीक्षा अन्तिम समयमा आएर हिजो साँझ स्थगित गरेको सरकारले विश्वविद्यालयको परीक्षा पनि स्थगित गरेको हो ।

सरकारले बढी मानिसको जमघट हुने सिनेमाहल देखि खेलस्थलसम्म बन्द गर्ने निर्णय गरेको थियो । उपप्रधानमन्त्री ईश्वर पोखरेलको सयोजकत्वमा गठित कोभिड १९ संक्रमण, रोकथाम तथा नियन्त्रण उच्चस्तरीय समन्वय समितिको बैठकले २५ जनाभन्दा बढी मानिसहरु भेला हुन बन्न गर्ने निर्णय गरेको हो । त्यसको अनुगमन गृह मन्त्रालय र संस्कृति, पर्यटन तथा नागरिक उड्डयन मन्त्रालयले गर्ने अनुगमन गर्ने निर्णय गरेको हो । सिनेमाहल, सांस्कृतिक केन्द्रहरु, रंगशाला, खेल स्थल, जिम हेल्थ क्लब, म्युजियम, स्विमिङ्ग पुल, मनोरञ्जनस्थल, डान्सबार तथा क्लब आदि बन्द गर्ने निर्णय गरेको समितिले जनाएको छ । यसगरी, सांस्कृतिक सामाजिक कार्यहरु पार्टी प्यालेस, मठमन्दिर, गुम्बा, मस्जिद, चर्च जस्ता धार्मिक एवं सार्वजनिक स्थलहरुमा २५ जनाभन्दा बढी मानिसहरुको भेला बन्द गरिएको छ ।

सरकारले यात्रा बन्देज गरेपछि त्रिभुवन विमानस्थलमा विमान आवतजावत निकै कम भएको छ । गरिएका युरोपका सबै मुलुकहरु, पश्चिम एशियालगायत खाडी क्षेत्रका मुलुकहरु, इरान, टर्की, मलेशिया, दक्षिण कोरिया, जापानबाट आउने र ती मुलुकलाई ट्रान्जिट बनाई अन्य जुनसुकै मुलुकबाट आउने सबै यात्रुलाई आगावमत रोक लगाएको छ ।

यसैगरी, नेपाली सेनाले कोरोना भाइरसको सम्भावित जोखिमलाई दृष्टिगत गरी आकस्मिक कक्ष देखि क्वारेन्टाइन बनाइसकेको छ । सेना, प्रहरी र सशस्त्र प्रहरीलाई जोखिम रोकथामका लागि एलर्ट गरिएको छ ।