‘मत बदर’बाट जोगिन यसो गर्दैछ एमाले

काठमाडौं, माघ १६ । यही माघ २४ गते हुने राष्ट्रियसभाको निर्वाचनका लागि नेकपा (एमाले) ले मतदाता अभिमुखीकरण तालीम सञ्चालन गर्ने भएको छ । पार्टी कार्यालय धूम्रबाराहीमा बसेको स्थायी कमिटी बैठकले निर्वाचनमा मतदान कसरी गर्ने भन्नेबारेमा सिकाउनका लागि अभिमुखीकरण तालीम सञ्चालन गर्ने निर्णय गरेको स्थायी कमिटी सदस्य शंकर पोखरेलले जानकारी दिए।

नेता पोखरेलका अनुसार यही माघ २१ गतेसम्म प्रत्येक प्रदेशमा मतदातालाई आफ्ना उम्मेदवारलाई मत हाल्नका लागि अभिमुखीकरण तालीम सञ्चालन हुनेछ ।

यसैगरी, बैठकले प्रदेश मुख्यमन्त्री र प्रदेशमन्त्रीको चयन राष्ट्रियसभाको निर्वाचनपछि गरिने निर्णयसमेत गरेको छ । राष्ट्रियसभा सदस्य निर्वाचनमा प्रदेश सदस्य तथा स्थानीय तहका प्रमुख–उपप्रमुख मतदाता छन् ।

पार्टी अध्यक्ष केपी शर्मा ओलीको अध्यक्षता र वरिष्ठ नेता झलनाथ खनाल, नेता माधवकुमार नेपाललगायतको उपस्थिति रहेको बैठकले नयाँ सरकार गठनपछि वर्तमान सरकारले गरेका पछिल्ला निर्णयको जिम्मेवारी नलिने निर्णय गरेको पनि नेता पोखरेलले बताए ।

चारवटा मतपत्र प्रयोग हुने भएकोले राष्ट्रियसभाको निर्वाचनमा निकै मत बदर हुन सक्ने चिन्ता निर्वाचन आयोगले प्रकट गरिरहेको परिवेशमा एमालेले मतदाता अभिमुखीकरण कार्यक्रमको तयारी गरेको हो ।