मुस्ताङ जाँदा अबदेखि आफ्नै गाडीमा सरर…

काठमाडौं, २३ जेठ – संसारकै मनोरम ठाउँ मध्येको एक मुस्ताङ जाँदा अब आफ्नै गाडीमा जान पाइने भएको छ । त्यहाँ लगाइएको सिन्डिकेट हटाइएपछि कुनैपनि पर्यटकले आफ्नो गाडी लगेर जान पाउने भएका हुन् ।

बेनी–जोमसोम सडकमा कायम रहँदै आएको २६ भन्दा बढी सिट क्षमताका सवारी सञ्चालनमा रोक लगाउने मापदण्ड समेत खारेज भएको छ । मापदण्डका कारण देशका विभिन्न ठाउँबाट मुस्ताङ घुम्न जाँदा बस रिजर्भ गरेर जानुपर्ने वाध्यता थियो । मुस्ताङ पुग्ने पर्यटक तथा तीर्थयात्री आफूले ल्याएको गाडी बेनीमा छोडेर स्थानीय यातायात व्यवसायीको गाडी चढेर जान बाध्य थिए । अबदेखि त्यो बाध्यता हटेको छ ।

म्याग्दी जिल्ला प्रशासन कार्यालय र जिल्ला यातायात व्यवस्थापन समितिको बैठकले पाँच वर्षदेखि लगाइएको सिन्डिकेट अर्थात मापदण्ड खारेज गर्दै नयाँ व्यवस्था गरेपछि पर्यटकका लागि सुविधा नभएको हो ।

विगतमा गरिएको २६ सिटसम्मको रुट इजाजत व्यवस्था खारेज गरी २७ फिटसम्म लम्बाइ भएका सवारीसाधनको रुट इजाजत प्रदान गर्न देशभरका यातायात व्यवस्था कार्यालयमा सिफारिस गर्ने निर्णय भएको सिडिओ लिलाधर अधिकारीले बताए ।

२०७१ वैशाख ८ गते तत्कालीन यातायात व्यवस्थापन समिति धौलागिरिको बैठकले सडकको जोखिमपूर्ण अवस्थालाई आधार बनाउँदै २६ सिटभन्दा बढी क्षमताका यात्रुबाहक सवारीसाधनलाई सञ्चालन गर्न नदिने निर्णय गरेको थियो ।