मोबाइल एप्स ट्याक्सीमाण्डु सार्वजनिक, अब घरबाटै ट्याक्सी बुक गर्न पाइने

एप्सको माध्यमबाट यात्रुले आफ्नो आवश्यकता अनुसार आफु बसेकै स्थानमा ट्याक्सी बोलाउने सुविधा भएको मोबाइल एप्स ट्याक्सीमाण्डु सुचारु भएको छ । विहिबार काठमाडौँको मित्रपार्कस्थित गोल्डेन लाइट पार्टी प्यालेसमा एक कार्यक्रम गर्दै ट्याक्सीमाण्डु एप्स शुभारम्भ गरिएको छ ।

एप्सको प्रयोगबाट ट्याक्सी चालकहरुले चोकचोकमा बसेर वा ट्याक्सी लिएर यात्रु खोज्दै हिड्ने झण्झटबाट मुक्ति पाउने ट्याक्सीमाण्डु प्रा.लि.का प्रवन्ध निर्देशक अर्जुन केसीले बताए । ट्याक्सी बुक गरेर आफु रहेकै स्थानमा बोलाउन पाइने सुविधाका कारण यातायात व्यवस्था विभागले तोकेको शुल्कभन्दा करिब १० प्रतिशत जति अतिरिक्त सेवा शुल्क लाग्ने प्रवन्ध निर्देशक केसीको भनाई छ ।

ट्याक्सीमाण्डुमा आवद्ध ट्याक्सी चालकहरुलाई बढिभन्दा बढि यात्रु उपलव्ध गराउने विषयमा आफुहरु लागि पर्ने ट्याक्सीमाण्डुकी प्रमुख कार्यकारी अधिकृत स्वीटी खत्रीले बताइन् । यात्रु र चालकको सुरक्षालाई मध्यनजर गर्दै चालक दर्ता प्रक्रिया नागरिकता, लाइसेन्स, ट्याक्सी नंवर, बिल बुक लगायतका डकुमेन्ट अनिबार्य गरिएको प्रमुख कार्यकारी अधिकृत खत्रीले जनाइन् ।

टयाक्सी चालक र यात्रुका लागि अलग अलग एप रहेको छ । चालक वा यात्रुले आफ्नो मोबाइलको गुगल प्ले स्टोर वा एप स्टोरबाट ट्याक्सीमाण्डु एप डाउनलोड गर्न सक्नेछन् । चालकले ट्याक्सीमाण्डु ड्राइभर र यात्रुले ट्याक्सीमाण्डु प्यासेन्जर एप डाउनलोड गरी यो एपको सुविधा लिने सुविधा रहेको छ ।

ट्याक्सीमाण्डुमा आवद्ध भएका चालकका लागि विभिन्न सुविधा र आयश्रोतको विकल्पहरु पनि खोजिने प्रवन्ध निर्देशक केसीले बताए । एप्स शुभारम्भ कार्यक्रममै ट्याक्सीमाण्डुसँग आवद्ध चालकलाई ह्याम्स अस्पतालमा उपचारमा १० प्रतिशत र औषधी खरिदमा ५ प्रतिशत छुट दिने सम्झौता भएको छ । त्यस्तै इ-सेवाबाट पे गर्ने चालक र यात्रुले आफुले पे गरेको रकममा १० प्रतिशत क्यास ब्याक समेत पाउने कार्यक्रममा बताइयो ।