यसरी यौनशोषण गरे राजपा केन्द्रीय सदस्यले युवती कर्मचारीलाई !

जनकपुर,११  चैत्र,   धनुषाको बनिनियाँ हेल्थपोष्टमा कार्यरत युवती निसाकुमारी झाले राष्ट्रिय जनता पार्टी नेपालका केन्द्रीय सदस्य रमन सिंहमाथि यौन शोषण र रकम लिएको आरोप लगाउँदै जिल्ला प्रशासन कार्यालय धनुषामा उजुरी दायर गरेकी छिन् ।  युवतीले उजुरीमा उल्लेख गरेअनुसार सिंहले आफूलाई राजपा नेपालका केन्द्रीय सदस्य र केयर सोसाइटी अफ नेपालको अध्यक्ष भनि परिचय दिएका र सम्बन्ध बढाएका थिए।

ती युवती घरपायक सरुवा नपाएर छटपटिएकी थाहा पाएपछि सिंहले, “सरुवा गराउनु कुनै ठूलो कुरो होइन । राजेन्द्र महतोसँग मेरो अत्यन्तै नजिकका हुन् । मैले भनेपछि उनले गराइदिन्छन्” भनेर प्रभावित गरेको उजुरीमा उल्लेख छ। आफूलाई काठमाडौं ल्याएको र राजेन्द्र महतोको निवासमा तीन पटक लगेर भेट गराएको पनि उजुरीमा खुलाएकी छिन् । सरुवा गराउन खर्च लाग्ने भनेकोले आफूसँग भएको भएभरको रकम रु १ लाख ३७ हजार सुम्पेको पनि उजुरीमै लेखेकी छिन्।

पुस २५ गतेदेखि माघ ४ गतेसम्म काठमाडौको गौशालास्थित रोज स्टार लज होटलमा राखेको र परिवन्धमा पारी पटक–पटक यौन शोषण गरेको किटानी गरेकी छिन्। काठमाडौंबाट फर्कंदा पनि बर्दिवासको नवोबुध्द होटलको २०५ नम्बर रुममा, जनकपुर आइपुगेर वेलकम होटलमा र जयनगर गएका बखत जयनगरको राजस्थान होटलमा राखेर अनेकौं प्रपञ्च रची यौनशोषण गरेको ब्यहोरा खुलाएकी छिन् ।  रकम लिएको र यौनशोषण गरेको कुरो कसैलाइ भन्योभने खैरियत छैन भनेर धम्क्याएको पनि उजुरीमै बताएकी छिन्। उक्त उजुरीलाइ जिल्ला प्रशासन कार्यालय, धनुषाले मिति चैत्र ८ गते  दर्ता-नम्बर ६१५३ मा दर्ता गरेको छ।

साँघुन्यूज बाट!