यूएनडीपीको पैसामा सांसदको रजाइँ

काठमाडौं ७ बैशाख । संघीय संसद्को बैठक नबसेको बेलामा केही समिति दातृ संस्था संयुक्त राष्ट्रसंघीय विकास कार्यक्रम (यूएनडीपी) को पैसामा घुमेका घुम्यै छन् ।

प्रतिनिधिसभाअन्तर्गतका ७ वटा र राष्ट्रियसभाअन्तर्गतको एउटा समिति यूएनडीपीको सहयोगमा घुम्दै गरेको नेपाल कम्युनिस्ट पार्टी (नेकपा) का सांसद झपटबहादुर रावलले आरोप लगाउनुभएको छ ।

‘मलाई प्रस्ट रुपमा थाहा छ, ती समितिहरु यूएनडीपीबाट परिचालित छन्, यसमा आयोजकको कुनै न कुनै स्वार्थ छ’, कैलाली–२ बाट निर्वाचित रावलले भन्नुभयो– ‘जसले लगानी गरेको छ, उसले आफूअनुसार सबैलाई प्रयोग गर्दछ, यो हाम्रो हितमा हुँदैन ।’

रावलले कुनै पनि दातृ निकायको सहयोग भएको आशंका गरेका कार्यक्रमहरु बहिष्कार गर्ने नीति नै बनाउनुभएको छ ।

उहाँले अरु सांसदलाई पनि आफ्नो अभियानमा लाग्न सहयोग पुर्‍याउन आग्रह गर्दै आउनुभएको छ । रावलले यो विषयबारे संसद्को आगामी बैठकमा उठाउने बताउनुभएको छ ।

प्रतिनिधिसभाको राज्य व्यवस्था तथा सुशासन समिति शुक्रबार हावाहुरी प्रभावित क्षेत्र बारा र पर्सा गएको छ । समितिको बिहीबारको बैठकमा समेत सभापतिले बारा र पर्सा जाने प्रस्ताव राखेपछि सांसद रावलले फेरि पनि यही प्रश्न दोहोर्‍याउनुभयो ।

रावलले बिहीबार पनि समितिकी सभापति शशी श्रेष्ठलाई दातृसंस्थाको लगानी छ कि छैन भनेर प्रश्न गर्नुभएको थियो ।

‘उहाँ (सभापति) ले ३ पटकसम्म मलाई कसैको पनि लगानी छैन भनेर विश्वास दिलाउनुभयो तर पनि म गइनँ’, रावलले भन्नुभयो– ‘कसैले सहयोग गर्छ भने राम्रो कुरा हो तर त्यो सहयोग सरकारलाई उपलब्ध गराएर संसद् सचिवालय हुँदै समितिमा आउनुपर्छ भन्ने मेरो तर्क हो ।’

केहीअघि पश्चिमका जिल्ला पुगेको निरुदेवी पाल सभापति रहेको महिला तथा सामाजिक समितिलाई पनि यूएनडीपीले लगानी गरेको थियो ।

२ साताअघि धुलिखेल पुगेको कल्याणीकुमारी खड्का सभापति रहेको विकास तथा प्रविधि समितिलाई पनि त्यो संस्थाले प्रत्यक्षरूपमा लगानी गरेको समितिकै कर्मचारी बताउँछन् । -नेपाल समाचारपत्र दैनिकबाट