रहबर सरावगीका ‘डमी’ उम्मेदवार हुन् !

काठमाडौं । पछिल्लो एक महिनायता एकाएक सामाजिक सञ्जालमा एक युवक हावी भएका छन् । विशेष गरी युवा र महिलालाई मीठा नारा र मोडलिङ गरिएको भिडियोबाट आकर्षित गरेका युवक हुन् बीरगन्ज बहुअरी निवासी ३१ वर्षीय रहबर अन्सारी ।

पाँच बर्षयतादेखि बीरगन्जमा बसोबास गरिरहे पनि बीरगंजवासीले उनको चुनावी भिडियो देखेर मात्र उनलाई चिनेका हुन् । असोज २ गते हुने स्थानीय तहको चुनावमा माओवादी केन्द्रबाट एकाएक रहबरको उम्मेदवारी किन पर्यो भन्ने भित्री रहस्य खुल्दै गएको छ । बिहीवार राति आफू निकटका चुनावी छलफलमा संघीय समाजवादी फोरम नेपालका बीरगन्ज महानगरपालिकाका मेयरका उम्मेदवार तथा व्यापारी विजय सरावगीले रहबर आफैंले खडा गरेको डमी उम्मेदवार रहेको खुलाएका हुन् । हंगेरीको बोडापेष्टमा स्नातकोत्तर अध्ययन गरिरहेका आफ्ना व्यापारिक साझेदार रहबरलाई कोर्ष पूरा नहुँदै बीरगन्ज बोलाएर मेयरमा उम्मेदवारी दिन लगाएको कुराको पुष्टि गर्ने थुप्रै आधार फेला पर्दै गएका छन् । एकाएक रहबरलाई वीरगन्ज बोलाएर मेयरमा उठाउनुको भित्री रहस्य चाहिँ बसरुद्दिन अन्सारीको मुस्लिम भोट कटौती गर्नु मूख्य लक्ष्य हो ।

गत जेठ अन्तिम साता बसरुद्दिन एमालेमा प्रवेश गरेदेखि मेयरमा उठ्ने पक्का थियो । सरावगी चाहिँ चैतदेखि नै फोरममा प्रवेश गरेर चुनावी रणनीति बनाएर प्रचार प्रसार थालिसकेका थिए । वीरगन्ज महानगरपालिकामा झन्डै ३२ हजार मुस्लिम मतदाता रहेका छन् । त्योसँगै क्याडर बेस्ड पार्टी एमालेको करिब १२ हजार भोट छँदैछ । मुस्लिम र एमालेको परम्परागत भोट जोड्दा बसरुद्दिन सजिलै मेयरमा बिजयी हुने देखेर सरावगीले मुस्लिम र पढेलेखेका युवाको भोट काट्न रहबरलाई कार्यकर्ता नै नभएको पार्टी माओवादीबाट उठाएका हुन् ।

बीरगंजका पढेलेखेका युवा सराबगीका वित्तीय अपराध र राजस्वमारा नियतबारे जानकार भएकाले उनलाई मत हाल्दैनन् । सराबगी र रहबर हस्पिटल, रेस्टुरेन्ट र ट्रेडिङ व्यापारका साझेदार हुन् । एकै वडा निवासी दुबैले उम्मेदवारी दर्ता गर्ने दिन मूख्य निर्वाचन अधिकृतको कार्यालयमा गला मिलेर एकअर्कालाई शुभकामना समेत दिएका थिए । त्यतिखेर सरावगीले अभि तुम्हारा बेस बन रहा है अग्ली बार के लिए अच्छा है भन्दै अंकमाल गरेका थिए ।

सामान्यतः दई उम्मेदवारको जुलुस एकैसाथ मूख्य निर्वाचन अधिकृत कार्यालयमा जाँदा नजुधोस् भनेर जिल्ला प्रशासन कार्यालय पर्साले सबै दललाई फरक–फरक समय उपलब्ध गराएको थियो । तर सराबगी र रहबरसँगै पुगेका थिए । त्यही दिन राजपाको राजेशमान सिंह र फोरम लोकतान्त्रिकका विमल श्रीवास्तवका कार्यकर्ताबीच भारतीय महावाणिज्य दूतावास अगाडि झडप भएको थियो । रहबरका बुवा डा.अनवर अन्सारी अहिले अख्तियार दुरुपयोग अनुसन्धान आयोगमा विगत २ बर्षदेखि मुद्दा खेपिरहेका छन् ।

कानुनविपरीत देवदह मेडिकल कलेजलाई ४० विद्यार्थी भर्नाको अनुमति दिएर भ्रष्टाचार गरेको आरोपमा सन् २०१५ मा मुद्दा दर्ता गरेको हो । मेडिकल काउन्सिलका तत्कालीन उपाध्यक्ष हरेका डा.अनवरले काउन्सिल ऐन, नियम र एक्रिडियसन स्टान्डर्ड फर द एमबीबीएस डिग्री प्रोग्राम २०१३ विपरीत अनुमति दिएको पाइएकाले पदाधिकारीविरुद्ध आरोपपत्र दायर गरिएको हो । अख्तियारले डा.अनवरलाई निलम्बन गरेको छ । अनवरको समूहले मेडिकल कलेजलाई सम्बन्धन दिने, सीट संख्या थप्ने, स्तरोन्नति गर्ने, फ्याकल्टी थप्ने, काउन्सिलको लाइसेन्स परीक्षा सञ्चालन गर्ने लगायतका कार्यमा व्यापक अनियमितता गरेको पाइएको थियो ।
सर्वप्रथम संसद चिकित्सकको रुपमा नियुक्त भएका डा.अनवरले त्यहाँ राजनीतिक सम्बन्ध विस्तार गरेपछि मेडिकल काउन्सिलमा मनोनीत भएका थिए । काउन्सिलमा आएपछि निजी मेडिकल कलेजलाई धमाधम सम्बन्धन दिने धन्दाको सुरुवात उनैले गरेका थिए । विदेश अध्ययन गर्न गएका एमबीबीएस विद्यार्थीलाई अध्ययन गरेकै कलेजमा इन्टर्नसिप गर्नुपर्ने प्रावधान डा.अनवरकै पालामा गरिएको हो ।

मुस्लिम भोट विभाजनका लागि रहबरलाई डमी उम्मेदवार बनाएका सरावगीले मारवाडी समुदायको भोट तान्न आफ्नो श्रीमतीलाई अगाडि सारेका छन् । यहाँका ठूला घरानाले सरावगीलाई राम्रो मान्दैनन् । उनले धेरै व्यापारी र उद्योगीलाई दुःख दिएका छन् । उनीहरुलाई फकाउन सरावगीले श्रीमतीलाई भोट माग्न घरमै पठाउने गरेका छन् । यसैगरी कांग्रेसबाट मेयरको टिकट दाबी गर्दै आएका वीरगन्ज उद्योग वाणिज्य संघका अध्यक्ष ओमप्रकाश शर्मा टिकट नपाएकाले असन्तुष्ट छन् । शर्मा सरावगीका पुराना दोस्त हुन् । उनलाई प्रयोग गरेर कांग्रेसको भोट बैंक मानिएका मारवाडी समुदायको भोट तान्ने प्रयासमा सरावगी लागेका छन् । मारवाडी समुदायमै नकारात्मक छवि बनाएका सरावगीलाई भोट दिलाउन बाबुलाल चाचानले समेत जिम्मा लिएको एक ब्यापारीले बताए ।

राजनीतिक नेतृत्वले राम्रो काम नगरेकाले आफू बाध्य भएर बीरगंजको माया लागेर राजनीतिमा आएको बताउने सरावगीले ब्यापारीक समुदायले मशालमा भोट हाल्ने कुरामा बर्णवाल समाजलाई आग्रह गरेका थिए ।

बकि तिनै सरावगीले गुड फोर पेमेन्ट प्रकरणमा ८६ करोड रुपैयाँ अपचलन गरेका छन् । बैंकका म्यानेजर अझै जेलमै छन् । सामुदायिक रेडियो नारायणी एफएमको किस्ता एफएमबाट तिर्न लगाएर एक कठ्ठा क्षेत्रफलमा निर्माण भएको ३ तल्ले घर श्रीमतीको नाममा दर्ता गराएका थिए । गत वर्षमात्र उनले त्यो घर एक करोड रुपैयामा जग्गा व्यापारी ज्योतिलाल कलवारका ज्वाईँलाई बिक्री गरेका थिए ।

मारवाडी समुदायको भोट पाउनकोलागि उनले आफनै पार्टीका अध्यक्ष प्रदीप यादवको गुण्डागर्दीको अन्त्यका लागि चुनावमा उठेको भन्दै मारवाडी समुदायका ब्यापारीलाई फकाउन समेत खोजेको बैठकमा सहभागी एक उद्योगीले बताए । यादवले भूमिगत कालमा भूमिगत मोर्चा र ब्यापारीका बीचमा बिचौलियाको भूमिका निर्वाह गरिदिन्थे । मारवाडी समुदायको घरमा माछामासु प्रवेश निषेध भए पनि उनकै घरमा मेस संचालन छ जहाँ दिनहुँ पचासौं किलो मासु पाक्ने गरेको छ । दैनिक बिहान र बेलुका १ हजार जनाले भोज खाने गरेका सरावगी आफैंले सुनाउने गरेका छन् । नाकाबन्दीमा केमिकल, पेट्रोलियम पदार्थको कालोबजारी, रौतहट जिल्लाको गौरमा रहेको राईसमिलको जग्गामा गिद्देनजर लगाउँदै आएका सरावगीले बीरगंज महानगरको नेतृत्व पाए बीरगंज थप बर्बादी पथमा अगाडि बढ्ने चर्चा छ । दृष्टि