राती १ बजेसम्म अनलाईन बैठक,केन्द्रीय कमिटीको बैठक बोलाउन हस्ताक्षर संकलन गर्दै नेकपा

काठमाडौं, असार २१ । नेकपालाई विभाजनबाट जोगाउन भन्दै नेकपाका केही नेताहरुले केन्द्रीय कमिटीको बैठक बोलाउन माग गरेका छन् । उनीहरुले बैठकका लागि अनलाईन मार्फत् प्रारम्भीक छलफल गरिसकेका छन् भने प्रारम्भीक भेलाको तयारी समेत गरेका छन् ।

हिजो राती अबेरसम्म अनलाईन मार्फत् भएको बैठकमा ५३ जना सहभागी भएको पार्टीका केन्द्रीय सदस्य ठाकुर गैह्रेले जानकारी दिए।बैठकले केन्द्रीय कमिटीको बैठक बोलाउनका लागि आवश्यक पर्ने प्रक्रिया अगाडी बढाउन भोली दिउँसो २ बजे प्रारम्भीक भेला आयोजना गर्ने निर्णय गरेको छ ।

उनले भेलापछि बैठक बोलाउन हस्ताक्षर संकलन समेत गरिने बताए । कुल केन्द्रीय सदस्य मध्ये २५ प्रतिशतले हस्ताक्षर गरेर बैठकको माग गरेमा बैठक बोलाउनु पर्ने व्यवस्था नेकपाको विधानमा छ । नेकपामा कुल केन्द्रीय सदस्य ४४५ जना रहेकोले ११२ जनाले हस्ताक्षर गरेर बैठक बोलाउन माग गरेमा बैठक बोलाउनु पर्ने देखिन्छ ।

एकतालाई जोगाउन सक्ने सवैभन्दा प्रभावकारी उपाय नै केन्द्रीय कमिटीको बैठक भएकाले तत्काल बैठक बोलाउन आफुहरुले माग गरेको गैह्रेले बताउनुभयो । कस्ले ठिक गरेको छ र कस्ले बेठिक गरेको छ भन्ने छुट्याउने र अन्तिम निर्णय गर्ने अधिकार केन्द्रीय कमिटीलाई भएकाले केन्द्रीय कमिटीबाट समाधन निकाल्न सकिने विश्वास उनले व्यक्त गरे ।

अनेरास्ववियुका पूर्व केन्द्रीय अध्यक्ष समेत रहेका गैह्रेले केन्द्रीय कमिटीले अन्याय गर्नेलाई सजाय र अन्यायमा परेकालाई न्याय दिने दावी पनि गरेका। उनले विभाजनको आगोमा घिउ हाल्ने काम बन्द गर्न र केन्द्रीय कमिटीको निर्णयका आधारमा अगाडि बढ्न शिर्ष नेताहरुलाई आह्वान पनि गरेका छन् ।

उनले भने“विभाजन गर्ने अधिकार कसैलाई छैन, देश, जनता र कार्यकर्ताको भावना नबुझ्ने मान्छे नेता बन्न सक्दैन, हल्ला र बहकावमा लाग्नु हुदैन ।” उनले नेकपाको विभाजन आफुहरुलाई स्विकार्य नहुने बताउदै एकताको नेता बनेका केपी ओलीलाई विभाजनको नेता नबन्न पनि आग्रह गरे ।

कार्यकर्ता र जनताको मन दुखाएर अहिले अर्को पार्टी बनाउनु पर्ने कुनै तर्क, औचित्य र आवश्यकता पुष्टि हुन नसक्ने नेता गैह्रेको भनाई छ ।