राष्ट्रपति रामचन्द्र पौडेलको पहिलो निर्णय यस्तो छ

काठमाडौँ । नव नियुक्त राष्ट्रपति रामचन्द्र पौडेलले आज मोरोक्को अधिराज्यका लागि गैरआवासीय नेपाली राजदूत नियुक्त गरेका छन् ।

उनले संविधानको धारा २८२ को उपधारा १ बमोजिम इजिप्टका लागि आवासीय राजदूत सुशीलकुमार लम्साललाई मोरोक्कोका लागि गैरआवासीय राजदूत पदमा नियुक्त गरेको राष्ट्रपतिको कार्यालयले जनाएको छ ।

‘सम्माननीय राष्ट्रपति रामचन्द्र पौडेलले नेपालको संविधानको धारा २८२ को उपधारा १ बमोजिम इजिप्टका लागि नेपालको आवासीय राजदूत सुशीलकुमार लम्साललाई मोरोक्को अधिराज्यका लागि समेत गैरआवासीय नेपाली राजदूत पदमा नियुक्त गर्नुभएको छ’, आज जारी गरेको विज्ञप्तिमा उल्लेख छ ।

पौडेलले आज मात्र राष्ट्रपतिको पद तथा गोपनीयताको शपथ ग्रहण गरेका थिए । उनले शीतलनिवास प्रवेश गरेपछि यो पहिलो निर्णय सार्वजनिक गरेका हुन् ।