राष्ट्रियसभामा पानीदेखि विद्युतीय सवारी साधनसम्मका कुरा

काठमाडौं । बुधबार राष्ट्रियसभाको बैठकमा सांसदहरुले खानेपानीदेखि राजधानीमा विद्युतीय सवारी साधन गुडाउनुपर्नेसम्मको विषयमा कुरा उठाएका छन् । समसामयिक विषयमा सरकारको ध्यानाकर्षण गराएका छन् ।

सांसद हरिचरण शिवाकोटीले जनताको आधारभूत आवश्यकता सरकारले पूरा गरेकाले प्रमुख प्रतिपक्षले राम्रोलाई राम्रो भन्नुपर्ने बताए ।

सांसद रमेशप्रसाद यादवले प्रधानमन्त्रीको अभिव्यक्तिले सङ्घीयता खतरामा परेकोले सचेत हुन आग्रह गरे । बारामा अन्तर्राष्ट्रिय विमानस्थलको नाममा जङ्गल फँडानी भइरहेकामा रोक्न पनि उनले माग गरे ।

पानीको मुहान सुक्दै गएकाले बेलैमा सरोकार भएका निकायको ध्यान जानुपर्ने उनको भनाइ थियो । किसानले उखु खेतीको भुक्तानी नपाएको र चुरे संरक्षण नारामा मात्र सीमित भएकाले सुधार गरिनुपर्ने माग सांसद यादवको थियो ।

सांसद सुमनराज प्याकुरेलले मर्यादाक्रम कानुनमै व्यवस्था गरिनुपर्ने र बेलाबेलामा परिवर्तन गर्न नहुने बताए । राजधानीमा पेट्रोलियम पदार्थको खपत कम गराउन विद्युतीय सवारी साधन चलाएर वातावरणमैत्री बनाइनुपर्ने उनको भनाइ थियो ।

सांसद जीतेन्द्रनारायण देवले मङ्गलबारको सभाको बैठकमा प्रधानमन्त्रीबाट संविधानको धारा ५६ र ५७ प्रतिकूल हुने गरी एकात्मक राज्य सत्तामुखी भई सङ्घअन्तर्गत प्रदेश सरकारप्रति आपत्ति जनाउँदै ध्यानाकर्षण गराए ।