लुम्बिनी सांस्कृतिक नगरपालिकामा सपथ

बुटवल, २६ असार । रुपन्देहीको लुम्बिनी सांस्कृतिक नगरपालिकामा बिजयी मेयर, उपमेयर लगायतका पदाधिकारी तथा सदस्यहरुले सपथग्रहण गरेका छन ।

लुम्बिनीस्थित निर्वाचन आयोगको कार्यालयमा आयोजित सपथग्रहण कार्यक्रममा लुम्बिनी सांस्कृतिक नगरपालिकाका निर्वाचन अधिकृत यमबहादुर कुँवरले मेयर तथा उपमेयरलाई सपथग्रहण गराएका हुन् ।

निर्वाचन अधिकृत कुँवरको सभापतित्व र सांसद कमलेश्वर पुरी गोश्वामीको प्रमुख आतिथ्यतामा सम्पन्न सपथग्रहण कार्यक्रममा बोल्दै नवनिर्वाचित मेयर मनमोहन चौधरीले निर्वाचन प्रचार प्रसारका क्रममा आफुले मतदाताहरुलाई दिएको प्रतिवद्धताहरु इमान्दारीताका साथ क्रमैसँग पुरा गर्दै जाने बताए ।

२० बर्ष पछि मात्रै बल्ल स्थानिय निकायहरुले जनप्रतिनिधि पाएको र लुम्बिनी सांस्कृतिक नगरपालिका घोषणा भएको लामो समय नभएकोले काम गर्न धेरै चुनौतीहरु रहे पनि चुनौतीहरुलाई पन्छाउदै नगरको बिकासमा लाग्ने प्रतिवद्धता जनाए ।

नगरपालिका घोषणा भए पनि पुर्वाधार बिकासको दृष्टिकोणले लुम्बिनी सांस्कृतिक नगरपालिका पछाडी रहेको भन्दै उनले गुरुयोजना बनाएर लुम्बिनीको समग्र बिकासमा अगाडी बढ्ने बताए ।
उनले नगरवासीहरुलाई पहिलो उपहारको रुपमा निशुल्क एम्बुलेन्स सेवा प्रदान गर्ने योजना सुनाउदै लुम्बिनी क्षेत्रलाई समेटेर लिंक रोड निर्माण गर्ने बताए ।

लुम्बिनीको जुन किसिमले बिकास हुनुपर्ने हो सो अनुरुप बिकास हुन नसकेको भन्दै मेयर चौधरीले लुम्बिनी बिकास कोषसँग सहकार्य गरेर समग्र लुम्बिनीको बिकासमा आफु लागि पर्ने उल्लेख गरे । नगरपालिका घोषणा भए पनि नगरपालिका क्षेत्र पुर्वाधार बिकासमा पछाडी रहेको भन्दै उनले लुम्बिनीलाई स्वच्छ,सफा र सुन्दर नगरपालिकाको रुपमा बिकास गर्ने प्रतिवद्धता ब्यक्त गरे ।

कार्यक्रममा रुपन्देही क्षेत्र नं ७ का सांसद कमलेश्वर पुरी गोश्वामीले लामो समय सम्म जनप्रतिनिधि बिहिन रहेका स्थानिय तहमा अहिले जनप्रतिनिधिहरु निर्वाचित भएकोले बिकास निर्माण गर्ने अवसर र चनौति दुबै रहेको भन्दै चुनौतिहरुलाई पन्छाउदै नगरको बिकासमा लाग्न नवनिर्वाचित जनप्रतिनिधिहरुलाई आग्रह गरे ।

स्थानिय तहको निर्वाचन पश्चात सिंहदरवारमा रहेको अधिकार जनताको घरदैलोमा आएको भनि जुन किसिमले मिडियामा प्रचार गरीएको छ सो अनुरुपको अधिकार अझै आईनसकेको भन्दै राजपा नेपालका केन्द्रिय नेता समेत रहेका सांसद गोश्वामीले जनप्रतिनिधिहरुलाई काम गर्ने अवसर भने प्राप्त भएको टिप्पणि गरे ।

सो अवसरमा जिल्ला निर्वाचन कार्यालय रुपन्देहीका प्रमुख हुमनाथ गौतम,लुम्बिनी सांस्कृतिक नगरपालिकाका सहायक निर्वाचन अधिकृत श्याम मौर्य लगायतले नवनिर्वाचित जनप्रतिनिधिहरुलाई बधाई दिदै सफल कार्यकालको कामना गरेका थिए ।

सो नगरपालिकामा मेयर पदमा निर्वाचित चौधरी राजपाका केन्द्रिय नेता हुन् भने उपमेयरमा निर्वाचित जानकीदेबि श्रीवास्तव संघिय समाजवादी फोरम र नयाँशक्ति पार्टी नेपालको तर्फबाट बिजयी भएकी हुन् ।

१३ वडा रहेको सो नगरपालिकामा सबैभधन्दा बढि संघिय समाजवादी फोरम र नयाँशक्ति पार्टी नेपालको संयुक्त प्यानलले पाँच वटा वडामा बिजयी भएको छ भने नेपाली कांग्रेसले ािनवटा वडा जितेर दोस्रो दल बनेको छ ।

त्यस्तैगरी नेपाल लोकतान्त्रिक फोरमले दुई वडामा र तिन वटा वडामा स्वतन्त्रबाट चुनाव लडेका बिजयी भएका छन् ।

स्वतन्त्रबाट बिजयी भएका दुई नम्बर वडाका वडा अध्यक्ष रमेश मल्लाह निसाद कांग्रेसका बागि उम्मेदवार हुन् ।