श्रीमानको कुटाईबाट सिराहामा एक महिलाको ज्यान गयो

अस्बिन खड्का

उदयपुर, १८ बैशाख । आफ्नै श्रीमानको कुटाईबाट सिराहामा एक महिलाको ज्यान गएको छ । गोलबजार नगरपालिका–७ चोहर्वाका ३५ वर्षीय कृष्ण शर्माको कुटाईबाट उनकी २३ वर्षीया श्रीमती प्रभादेवी शर्माको ज्यान गएको माइती पक्षले आरोप लगाएका छन् ।

मंगलबार बेलुका मरणासन्न हुनेगरी कुटपिट गरी बेहोस भएका प्रभालाई उपचारको लागि कर्जन्हास्थित फूलकुमारी मेमोरियल अस्पताल लैजाँदै गर्दा उनको बाटोमै मृत्यु भएको प्रभादेवीका दाजु रामसागर शर्माले बताए ।

गत वर्षमात्र वैदेशिक रोजगारीबाट आएका कृष्णले यसअघि पनि आफ्नो बहिनीलाई पटकपटक कुटपिट गर्ने गरेको रामसागरले जानकारी दिएका छन् ।

प्रभाको शव पोष्टमार्टमको लागि लैजाने तयारी गरिरहेको इलाका प्रहरी कार्यालय गोलबजारले जनाएको छ । मृतकको नाकबाट हल्का रगत आएकोले कुटपिटको आशंका गरिए पनि पोष्टमार्टमपछि मात्र केही भन्न सकिने प्रहरीेले जनाएको छ ।

प्रहरीले कृष्णलाई अनुसन्धानको लागि नियन्त्रणमा लिएको छ । उनीहरुको एक १६ महिनाको छोरी रहेको छ, भने ३ महिनाको गर्भसमेत रहेको परिवारजनले जानकारी दिएको छ ।