संशोधनमा दुईतिहाई नपुगेपछि सरकारले संसद बैठक स्थगित गरायो

काठमाडौं, १७ बैशाख– शनिवार रातभरी लगाएर सत्तापक्ष र मधेसी मोर्चाको एउटै संशोधन प्रस्ताव संसदमा दर्ता गराएको सरकार आइतबार जसरी पनि संविधान संशोधन पारित गर्ने तयारीमा थियो । तर, आइतबार सत्तारुढ प्रस्तावको पक्षमा दुईतिहाई नपुग्ने सम्भावना प्रष्ट भएपछि सभामुख ओनसरी घर्तीले बैशाख २१ गते सम्मका लागि सूचना टाँस गरी संसद बैठक स्थगित गरेकी छिन् ।

संशोधनको कार्यसूची सरकारले संसदमा प्रस्तुत गरेको हुनाले सरकार स्वयं नै उक्त कार्यसूचीबाट पछि हट्नु पर्ने सूचना सभामुखलाई दिएपछि संसद बैठक स्थगित भएको हो ।

आइतबार फास्टट्र्याकबाट संशोधन प्रस्ताव पारित गराउने सहमति मधेस केन्द्रित मोर्चासँग भएको भनी कांग्रेस र माओवादीका नेताहरुले प्रचार गर्दै आइरहेका थिए । एमालेले संशोधन प्रस्तावमा सहमति नदिने वताएपछि सत्तारुढ पक्षका नेता शेरबहादुर देउवा र प्रधानमन्त्री पुष्पकमल दाहालले पटक पटक एमाले बाहेक नै दुईतिहाई पुर्याएर देखाइदिने वताउँदै आएका छन् । आइतबार भने यसरी देखाउन नसकेपछि संसद बैठक स्थगित भएको छ र आफ्नो पक्षमा पर्याप्त समर्थन देखाउन चार दिनको समय सत्तापक्षले लिएको छ ।

मधेस केन्द्रित मोर्चासँग भएको भनी प्रचारित सहमति अनुसार स्थानीय तहको पहिलो चरणको चुनावमा उम्मेदवार मनोनयन गर्ने मिति बैशाख १९ अघि नै संशोधन गर्ने भनी सत्तापक्षले भन्दै आएको छ । अव चार दिन म्याद थपिएपछि मोर्चाको रणनीति के हुने भन्ने अन्यौल बढेको छ भने सत्तापक्षले बाँकी चार दिनमा सम्पूर्ण शक्ति लगाएर संशोधन प्रस्तावको पक्षमा दुईतिहाई मत पुर्याउन प्रयास गर्नेछ ।