‘सत्तासिन कामरेडहरु… ५० हजारलाई भोज खुवाउने खर्च लगानी गरेको भए’- बाबुराम भट्टराईको व्यंग्य

काठमाडौं । नेपाल कम्युनिष्ट पार्टी (नेकपा)ले आज शनिबार चियापान कार्यक्रम गर्दैछ । चियापान कार्यक्रममा ५० हजारलाई निम्तो दिइएको छ ।

नेकपा एमाले र नेकपा माओवादी केन्द्रको एकतापछिको पहिलो चियापान कार्यक्रममा आफू आउन नसक्ने भन्दै नयाँ शक्ति पार्टीका संयोजक डाक्टर बाबुराम भट्टराईले व्यंग्यात्मक ट्विट गरेका छन् ।

आज दिउसो भृकुटीमण्डपमा आयोजना गर्न लागिएको चियापन कार्यक्रममा आफू उपस्थित हुन नसक्ने भट्टराईले ट्विट मार्फत व्यक्त गरेका हुन् । भट्टराईले चारवटा निमन्त्रणापत्रसमेत राखेर ट्विट गरेका छन् ।

‘सत्तासिन कामरेडहरु, एउटै खाममा ४ वटा शुभकामना ! निमन्त्रणा कार्ड पठाउनुभएकोमा धन्यवाद ! तपाइँहरु सबैको भलो होस्, हाम्रो पनि शुभकामना ! गरीव देशको सर्वहारावर्गको दुहाइदिने पार्टीले ५० हजारलाई भोज खुवाउने खर्च कुनै उत्पादनको क्षेत्रमा लगानी गरेकोभए राम्रो हुन्थयो कि ? त्यसैले म आउन सकिनँ ! जय होस ।’ बिहान गरेको ट्विटमा लेखिएको छ ।

२०७५ सालको वडा दशैं, तिहार, नेपाल सम्वत् ११३९ नयाँ वर्ष, छठ लगायत समस्त नेपाली चाडबाडको उपलक्ष्यमा आयोजित शुभकामना आदानप्रदान कार्यक्रमका लागि प्रधानमन्त्री तथा नेकपाका अध्यक्ष केपी शर्मा ओली र अर्का अध्यक्ष पुष्पकमल दाहालद्धारा हस्ताक्षरित निमन्त्रणापत्र बाँडिएको थियो ।