सभामुख महराको प्रेस संयोजकमा दाङबाट डिल्ली मल्ल सिफारिस

काठमाडौं, ३ चैत । सभामुख कृष्णबहादुर महराको प्रेस संयोजकमा प्रेस सेन्टर दाङका अध्यक्ष एवं नेपाल पत्रकार महासंघ दाङका उपाध्यक्ष डिल्ली मल्ललाई सिफारिस गरिएको छ । प्रेस सेन्टर दाङको शुक्रवार घोराहीमा बसेको बैठकले मल्ललाई प्रेस संयोजकमा सिफारिस गरेको हो ।

दाङबाट प्रकाशित हुने नौलो जनउभार साप्ताहिकको सम्पादकका रुपमा कार्यरत मल्ल सल्यानको कुमाख गाउँपालिका निवासी हुन् । मल्ल जनयद्धकालदेखि नै पत्रकारिता र साँस्कृतिक मोर्चामा क्रियाशील थिए । जनादेश, जनदिशा, गोरखापत्र, लालरक्षक लगायतका पत्रपत्रिकामा रिपोर्टिङ गरेका मल्लले नौलो जनउभार साप्ताहिक, अन्तध्र्वनि साहित्यिक त्रैमासिक लगायत विभिन्न पत्रपत्रिकाको सम्पादन गरिसकेका छन् । पत्रकारितामा क्रियाशील हुनुअघि मल्ल माओवादी निकट प्रतिरोध, सामना परिवार लगायतका साँस्कृतिक टोलीमा रहेर काम गरेका थिए ।

अध्यक्ष मल्ल सभामुखको प्रेस संयोजकमा सिफारिस भएपछि प्रेस सेन्टर दाङको कार्यवाहक अध्यक्षको जिम्मेवारी बरिष्ठ उपाध्यक्ष प्रकाश चौधरीलाई दिइएको छ । मल्लको अध्यक्षता तथा माओवादी केन्द्र दाङका जिल्ला सहइन्चार्ज हेमराज शर्मा “डायमण्ड”को प्रमुख आतिथ्यमा बैठक बसेको थियो ।

सभामुख कृष्णबहादुर महरा दाङ– २ बाट निर्वाचित भएका थिए । महराले दाङलाई नै कर्मभूमि बनाएका मल्ललाई आफ्नो प्रेस संयोजकमा चुनेका हुन् ।