आयुर्वेद अस्पतालका प्रमुख डाक्टर नक्कली !

काठमाडौं, ८ साउन । नेपाल प्रहरीको केन्द्रीय अनुसन्धान ब्यूरोले २ बर्षअघि नक्कली शैक्षिक प्रमाणपत्रका आधारमा ३६ डाक्टरलाई पक्राउ गरेको घटना सेलाइनसक्दै आयुर्वेद क्षेत्रमा पनि यस्तै समस्या देखिएको छ । नरदेवी आयुर्वेद अस्पतालका प्रमुख डा श्यामबाबु यादवले बिहारको सितामढीको एक कलेजको आइएसीको नक्कली प्रमाणपत्रका आधारमा ब्याचलर अफ आयुर्वेद मेडिसिन सर्जरी(बीएमएस) अध्ययन गरी एमडी समेत गरेको खुलेको छ । उनले नेपालमा आयुर्वेद सहायक अध्ययन गरिरहेको समयमा भारतको बिहारमा विज्ञान बिषयमा आइएससी अध्ययन गरेको देखिएको छ ।

डा यादव त्रिभुवन विश्वविद्यालय अन्तर्गतको आयुर्वेद क्याम्पसमा सहायक आयुर्वेद कार्यकर्ता अध्ययनका लागि २०४६ मा भर्ना भएका उनको प्रमाणपत्रबाट खुल्छ । उनले २ बर्षमा आयुर्वेदको कोर्ष पूरा गरी २०४८ साउन १३ मा पास गरेको देखिन्छ । प्राविधिक बिषय आयुर्वेद, अहेव, सीएमए जुनसुकैमा कम्तीमा ३ महिना प्रयोगात्मक (ओजेटी) गर्नैपर्छ । कोर्ष २०४७ चैतमा सकिए पनि ओेजेटी ३ महिना कम्तीमा गर्दा उनको पढाइ २०४८ साउनसम्म नै हुन्छ । डा यादवले २०४६ साउनदेखि २०४८ साउनसम्म नै नेपालको आयुर्वेद क्याम्पसमा नियमित अध्ययन गरेर मात्र प्रमाणपत्र पाएका हुन्।

इस्वी सन् १९८९ जुलाईदेखि १९९१ जुलाईसम्म उनले नेपालको आयुर्वेद क्याम्पसमा अध्ययन गरेको देखिन्छ । तर उनले बीएमएस अध्ययनका लागि पेश गरेको भारत बिहारको सीतामढीको रामऔतार राजकिशोर माधुरी यादव कलेजको प्रमाणपत्रमा सन् १९९० देखि १९९२ सम्म आइएससी अध्ययन गरेको उल्लेख छ । आयुर्वेद प्राविधिक त्यो पनि मेडिसिन बिषयमा अनिवार्य कक्षामा उपस्थित हुनैपर्छ । आइएससी विज्ञान बिषय भएकाले कक्षामा उपस्थित हुनैपर्छ । उनले नेपालमा आयुर्वेद अध्ययन गरिरहेकै समयमा बिहारको सितामढीबाट कसरी आइएससी पास गरे ? यसमा अख्तियार दुरुपयोग अनुसन्धान आयोग, राष्ट्रिय सतर्कता केन्द्र जस्ता सरोकारवाला निकायले छानबिन गर्नुपर्छ । दुवै बिषय विद्यार्थी स्वयं कक्षामा उपस्थित भएर अध्ययन गर्नुपर्ने बिषय भएकाले एउटा नक्कली नै हो भन्ने कुरा जोकसैले ठहर गर्नसक्छ, स्रोत भन्छ– भारतबाट ल्याएको यादवको आइएससीको प्रमाणपत्र नक्कली हो ।

त्यही नक्कली प्रमाणपत्रका आधारमा यादवले आयुर्वेदमा बीएमएस र एमडी गरिसकेका छन् । उनी यसअघि आयुर्वेद काउन्सिलको कार्यकारी निर्देशक र एक महिनाअघि मात्र नरदेवी आयुर्वेद अस्पतालका प्रमुखको जिम्मेवारी पाएका छन् । दृष्टि साप्ताहिकका अनुसार नक्कली प्रमाणपत्रका आधारमा बीएमएस र एमडी गरी सरकारको उच्च ओहदाप्राप्त गरिसकेका यादवमाथि छानबिन गरी आवश्यक कारबाहीका लागि अख्तियारले पनि चासो दिनुपर्ने आयुर्वेद अस्पतालका एक चिकित्सक बताउँछन्, एलोपेथिक चिकित्सामा मात्र होइन, आयुर्वेदमा पनि यस्ता नक्कलीहरुको बिगबिगी छ । यादवमात्र होइन, आयुर्वेदका अरु नक्कली डाक्टरहरुको पनि छानबिन गरी कारबाही हुनुपर्छ ।