सरकारमा आउने हो कि होइन ? राजपा नेताहरुलाई प्रधानमन्त्रीको प्रश्नः???????

४ साउन– प्रधानमन्त्री शेरबहादुर देउवाले राजपाका नेताहलाई सरकारमा सहभागिता जनाउन आग्रह गर्नु भएको छ । प्रधानमन्त्री निवास वालुवाटारमा बुधवार बिहान बसेको सत्तारुढ कांग्रेस, माओवादी र राजपाका नेताहरुको बैठकमा प्रधानमन्त्री देउवाले सरकारमा सहभागि हुन राजपा नेताहरुलाई आग्रह गर्नु भएको हो ।

‘भोलि मन्त्रिपरिषद विस्तारको तयारी छ, राजपा सरकारमा सहभागि हुने वा नहुने विषयमा उसको धारणा माग्ने काम भयो’ बैठकपछि माओवादी नेता नारायणकाजी श्रेष्ठले भन्नु भयो ।

संविधान संशोधन र राजपाका अन्य मागहरुबारे छलफल गर्न बसेको बैठकमा संशोधनबारे छलफल हुन नसकेको राजपा अध्यक्ष महन्थ ठाकुरले वताउनुभयो ।

संविधान संशोधन प्रस्ताव, तेस्रो चरणको निर्वाचन र सरकार विस्तारका बारेमा छलफल गर्न बसेको बैठकमा संविधान संशोधन प्रस्तावबारे कुरै नभएको माओवादी नेता श्रेष्ठले वताउनुभयो । माअवादी नेता श्रेष्ठका अनुसार राजपाले राखेका सहिद घोषणा, अन्दोलनमा घाइतेको उपचार खर्चलगायतमा छलफल भएपनि संविधान संशोधन प्रस्तावबारे बैठकमा छलफल भएन ।

बैठकपछि राजपा अध्यक्ष मण्डलका संयोजक महन्थ ठाकुरले बैठकले कुनै ठोस निष्कर्ष निकाल्न नसकेको बताउनुभयो । राजपा सरकारमा जाने विषय, संविधान संशोधन र अन्य मागबारे छलफल गर्ने तय भए पनि सरकारले संशोधनको विषय उठाउन नचाहेको ठाकुरको भनाई थियो ।