सरकारले काम नगरेको भन्दै देउवाले गरे आलोचना

भक्तपुर । नेपाली कांग्रेसका सभापति एवं पूर्वप्रधानमन्त्री शेरबहादुर देउवाले सरकारले एक वर्षको अवधिमा जनताले परिवर्तन र राहतको महसुस गर्नेगरी उपलब्धिमूलक काम गर्न नसकेको आरोप लगाएका छन् । कांग्रेस भक्तपुरले मध्यपुरथिमिको शंखधर चोकमा आयोजना गरेको विरोधसभामा सरकारले एक वर्षको अवधिमा जनतालाई करको भार मात्रै बढाएको बताए ।

जनताको पक्षमा सरकारले कुनै काम गर्न नसकेको आरोप लगाउँदै सभापति देउवाले दुई तिहाइको आडमा सरकारले अप्रजातान्त्रिक गतिविधि गरिरहेको जिकिर गरे ।

देउवाले देशमा हत्या, हिंसा, बलात्कारका घटना बढेपनि दोषीलाई कारवाही गर्न सरकारले नसकेको बताए । यस्ता घटना नियन्त्रण गर्न पनि सरकार असफल भयो सरकारले चाहे निर्मला हत्याकाण्डका दोषीलाई पक्राउ गर्न सक्छ तर सरकारले नचाहेको टिप्पणी गरे।

कार्यक्रममा नेता प्रकाशमान सिंहले सरकारले जनताले मूल्यांकन गर्न मिल्ने गरी सरकारले कुनै काम गर्न नसकेको आरोप लगाए । नेता सिंहले कम्युनिष्ट सरकारले सङ्घीयतालाई बचाउन सक्ने गरी सङ्घीयता कार्यान्वयन हुन सक्ने गरी काम गर्न नसकेको आरोप लगाए ।

कार्यक्रममा अर्का नेता कृष्णप्रसाद सिटौलाले सरकारले जनतालाई कर र मंहगी दिएको आरोप लगाउँदै घोषणा गरे पनि कामको कार्यान्वयनमा सरकार अगाडि बढ्न नसकेको बताए ।