सरकारले टुटल पठाओलाई संरक्षण गरे विद्रोह गर्ने ट्याक्सी व्यवसायीको चेतावनी

मंगलबार काठमाडौँमा पत्रकार सम्मेलन गर्दै ट्याक्सी व्यवसायीले टुटल तथा पठाओ विरुद्ध लडने चेतावनी दिएका छन् । सरकारले टुटल र पठाओलाई संरक्षण गरे आफुहरु विद्रोहमा उत्रन बाध्य हुने चेतावनी ट्याक्सी व्यवसायीले दिएका हुन् ।

नीजि सवारीलाई व्यवसायीक प्रयोजनका लागी कानुनले निषेध गरे पनि टुटल र पठाओले प्रयोजन विपरित सेवा दिइरहेको उल्लेख गर्दै उपत्यका ट्याक्सी व्यवसायी तथा चालक सेवा समाजका महासचिव पूर्णलाल मोक्तानले यस्ता एप्समार्फत यात्रु बोकिरहेकाहरुलाई राज्यले एक पटक संरक्षण दिएको र फेरि पनि संरक्षण दिए आफुहरु सरकारसँगै लड्न ततयार रहेको बताए ।

पत्रकार सम्मेलनमा आक्रोशितरुपमा प्रस्तुत भएका महासचिव मोक्तानले ट्याक्सी व्यवसाय सञ्चालनका लागि २७ प्रकारको कर तिरेको, यात्रुको बीमा गरेको तर टुटल र पठाओले केही नगरे पनि भाडाका सवारी सरह सञ्चालन गर्न दिएको आरोप लगाए ।

यस्तै तरिकाले टुटल र पठाओको सेवा सुचारु भइरहे ट्याक्सी सिंह दरबारमा र मीटर नापतौल विभागमा लगेर राखिदिने उपत्यका ट्याक्सी व्यवसायी तथा चालक सेवा समाजका अध्यक्ष सानु पूर्वछाने मगरले चेतावनी दिए । ट्याक्सको भाडा ६९ सालदेखि समायोजन नगरिएको तर ‘हाउमच’ र एप्सको नाममा विभेद गरिदै आएको पनि अध्यक्ष पूर्वछाने मगरले बताए ।

मगरले यातायात मन्त्री, यातायात व्यवस्था विभागका महानिर्देशक, ट्राफिक प्रमुख लगायतलाई यातायात व्यवस्था ऐन पल्ट्याएर हेर्न अनुरोध गरे । ट्याक्सी व्यवसायी प्रविधि र यात्रुलाई सेवा दिने कुराको विरोधी नभएको बताउँदै पूर्वछाने मगरले आफुहरु जस्तै कर तिरेर र मीटर जोडेर आएका आपत्ति नहुने बताए ।