सरकार पूर्णरुपमा असफल: नेता सिंह

काठमाडौं, ४ मंसिर। नेपाली कांग्रेसका नेता प्रकाशमान सिंहले मुलुक संचालनमा वर्तमान सरकार पूर्ण रुपमा असफल भएको दाबी गरेका छन्। मन्त्रिपरिषद् बैठकको निर्णय सार्वजनिकमा गरेको आलटालले सरकार कस्तो छ भन्ने प्रस्ट उनको भनाइ थियो।

मंगलबार प्रेस युनियनले प्युठानमा आयोजना गरेको कार्यक्रममा बोल्दै नेता सिंहले सरकारले प्रभावकारी काम गर्न नसकेको आरोप लगाएका हुन्। ‘सरकारले न विकास बजेट खर्च गर्न सकेको छ नत दैनिक प्रशासन नै प्रभावकारी रुपमा संचालन गर्न सकेको छ,’ नेता सिंहले भने, ‘शान्ति सुरक्षा दिन, अन्तर्राष्ट्रिय सम्बन्ध सहज बनाउन पनि सरकार असफल भएको छ। यति सहज वातावरण हुँदासमेत केही गर्न नसक्ने सरकारलाई कसरी सफल भन्ने?’ काम केही गर्न नसक्ने तर विभिन्न मन्त्रालयका अधिकार कटौती गरी प्रधानमन्त्री कार्यालयमा ल्याउन लागिएको भन्दै नेता सिंहले सरकारले संघीयतामा ध्यान नदिइ मुलुकमा राजनीतिक अन्योलता बढाउन खोजेको आरोप लगाए।

आफूहरुले सरकारलाई रचनात्मक प्रतिपक्षीको रुपमा खबरदारी गरिहेकाले विपक्षीकोे भूमिका प्रभावकारी भएन भन्नु उचित नहुने बताए। फरक प्रसंगमा नेता सिंहले कांग्रेस नेतृत्व प्रभावकारी रुपमा संचालन हुन नसकेको भन्दै विधि र प्रक्रियाबाट नेतृत्व चल्नुपर्ने बताए।