सहमति नभए एमालेले भोटिङबाट मुख्यमन्त्री छान्ने

काठमाडौं, १६ माघ । नेपाल कम्युनिष्ट पार्टी एमालेले प्रदेशका मुख्यमन्त्रीमा सर्वसम्मति हुन नसकेमा भोटिङबाट तय गर्ने निर्णय गरेको छ । केन्द्रीय कार्यालयमा बसेको स्थायी समितिको बैठकले मुख्यमन्त्रीका दावेदारहरुबीच सर्वसम्मतिमा निर्णय हुन नसके प्रदेशसभामा पार्टीबाट निर्वाचित सांसदहरुले संसदीय दलको बहुमतबाट मुख्यमन्त्री चुन्ने निर्णय गरेको हो ।

सर्वसम्मत हुन नसकेका ठाउँमा निर्वाचनबाट संसदीय दलको नेता चयन हुन्छ र संसदीय दलको नेता मुख्यमन्त्री हुनेछन् । प्रदेशसभाको बैठकले कार्यविधि तय गरेपछि मुख्यमन्त्री नियुक्त हुने एमाले नेता वामदेव गौतमले बताएका छन् ।

अहिलेसम्म प्रदेश ५ मा मात्र स्थायी समिति सदस्य शंकर पोखरेल सर्वसम्मतरुपमा एमाले संसदीय दलको नेतामा चयन भएका छन् । माओवादी केन्द्र र एमालेबीचको सहमतिअनुसार एमालेले पाएका प्रदेशहरुमध्ये सर्वसम्मत भएको ५ नम्बर प्रदेशमात्र हो । अन्य प्रदेशमा एक भन्दा बढी दावेदार छन् ।

एमालेले राष्ट्रियसभाको निर्वाचन तयारी सम्बन्धी पनि छलफल गरेको छ । राष्ट्रियसभा चुनावमा मतदान गर्ने प्रदेशसभाका सांसद र स्थानीय तहका प्रमुख र उपप्रमुखलाई २१ माघमा मतदान गर्ने तरिकाबारे प्रशिक्षण दिने तयारी पनि एमालेले गरेको छ ।