फ्रान्सको स्ट्रास्बर्गस्थित क्रिसमस बजारमा गोली चलाउने बन्दुकधारी गोली हानाहानमा मारिए

एजेन्सी२८,मंसिर ।फ्रान्सको स्ट्रास्बर्गस्थित क्रिसमस बजारमा गोली चलाउने बन्दुकधारी प्रहरीसँगको गोली हानाहानको क्रममा मारिएका छन्।मंगलबार स्ट्रास्बर्गको क्रिसमस बजारमा भएको आक्रमणमा ३ जनाको ज्यान गएको थियो भने अन्य कैयौँ गम्भीर घाइते भएका थिए।

घटना भए लगत्तै प्रहरीले आक्रमणकारीको खोजतलाश थालेको थियो।

पछिल्लो कारबाहीमा मारिएका २९ वर्षीय शेरिफ शेकाट फ्रान्स र जर्मनीमा विभिन्न आपराधिक कार्यहरूमा यसअघि पनि संलग्न रहेको प्रहरीको भनाइ छ।

शेकाटको अनुहार क्रिसमस बजारमा भएको आक्रमणमा शंकास्पद भनेर सार्वजनिक गरिएको तस्बिरसँग मिल्दोजुल्दो भेटिएपछि गस्तीमा रहेका ३ जना प्रहरीको समुहले उनलाई रोक्ने प्रयास गरेको तर उनले फर्केर गोली प्रहार थालेपछि उनीविरुद्ध प्रहरीले गोली चलाएको त्यसपछि शेकाटको मृत्यु भएको फ्रान्सका आन्तरिक मन्त्री क्रिश्टोफर कास्टानेले बताए।