सामाजिक सञ्जालमा भाइरल बनेको राष्ट्रपति र प्रधानमन्त्रीको टीका

दशै लगभग सकि सकेको छ । कोजाग्रत पूर्णिमा आउन दुई दिन बाँकी छँदै केही तस्विरहरु भने सामाजिक सञ्जालमा भाइरल बनिरहेका छन् । ती भाइरल बनेका तस्विरहरु हुन् राष्ट्रपति र प्रधानमन्त्रीले सर्वसाधारण तथा उच्चपदस्थलाई लगाइदिएको टीकाको ।

दोस्रो पटक राष्ट्रपतिमा निर्वाचित भएपछि प्रधानन्यायाधीश गोपाल पराजुलीले बिद्यादेवी भण्डारीलाई पद तथा गोपनियताको सपथ खुवाएका थिए । तर, दशैंको टीका तथा जमरा ग्रहण गर्न शितलनिवास पुगेका निवर्तमान पराजुलीले राष्ट्रपति भण्डारीका अगाडी यसरी घुँडा टेकेको फोटो सार्वजनिक भएपछि अहिले चौतर्फी आलोचना भइरहेको छ ।

प्रहरी महानिरिक्षक सर्वेन्द्र खनाल, ललितपुर महानगरपालिकाका प्रमुख चिरिबाबु महर्जन, निर्वतमान प्रधानसेनापति राजेन्द्र क्षेत्री र नेकपाका नेता बामदेब गौतमले पनि राष्ट्रपतिसँग टिका ग्रहण गर्दा कुर्सी पाएनन् । देशको उच्च ओहोदामा पुगेर निवर्तमान भएका र बहालवाला ब्यक्तीलाई राष्ट्रपति सचिवालयले नचिन्ने कुरै भएन । तर, यस्तो ब्यवहार किन गरियो सर्वत्र आलोचना भइरहेको छ ।
शुभसाइतमा ९ बजेर ५१ मिनेटमा टीका सुरु भएको थियो । राष्ट्रपति भण्डारीका अगाडि दुई वटा कुर्सी राखियो । छोरी, ज्वाई तथा आफन्तले कुर्सीमा बसेर टीका ग्रहण गरे । त्यसलगत्तै अन्य उपस्थितले टीका तथा जमरा ग्रहण गर्ने समयमा कुर्सी हटाइयो । फेरि आफन्त आएपछि यसरी कुर्सी राखियो ।

शितल निवासमा उपराष्ट्रपति, प्रधानमन्त्री देखि उच्चपदस्थ ब्यक्तिहरुले राष्ट्रपति भण्डारीबाट टीकासँगै जमराको माला पनि कुर्सीमै बसेर लगाए । त्यसलगत्तै अन्य ब्यक्तीहरुका लागि फेरि हटाइएको थियो ।

https://www.youtube.com/watch?v=OVqUsQFe7Fk

उता प्रधानमन्त्री केपी ओलीले लगाएको टीकाको पनि आलोचना भइरहेको छ । अझ प्रधानमन्त्री ओलीले कोजाग्रत पूर्णिमासम्मै टीका लगाइदिने सार्वजनिक भए पछि त सामाजिक सञ्जालमा उनको निकै आलोचना भयो । राष्ट्रपतिले जस्तो ओलीले बसेर भने टीका लगाइदिएनन् । उनले उभिएरै टीका लगाइरहेका छन् तर, उनले बाँया हातले जमरा दिइरहेको कुरा पनिमा पनि आलोचना भइरहेको छ ।

तस्विर : सामाजिक सञ्जाल