सामुदायिक वनमा वाघ खोज्न सिटिटिभि क्यामेरा जडान……..

बुटवल, ९ साउन । रूपन्देहीको तिलोत्तमा नगरपालिकाअन्तर्गत शंकरनगर सामुदायिक वनमा बाघ पत्ता लगाउनको सिसिटिभी क्यामेरा जडान गरिँदै छ ।                                                                                                                                                                                                                                          सो क्यामरा जडानको लागि जिल्ला वन कार्यालयको नेतृत्वमा डब्लुडब्लुएफका वन्यजन्तु अनुसन्धान अधिकृतहरू दुई दिनदेखि रूपन्देहीका शंकरनगर क्षेत्रमा खटिएका छन् ।                        सो क्षेत्रमा रहेका बाघ बादरसँग लडेको स्थानीयले देखेपछि सामुदायिक वनमार्फत आएको टोलीले बाघ हिंडेको क्षेत्र निरीक्षण गर्नुका साथै सर्भेको काम दुई दिनमा सम्पन गरेको छ ।                                                                                                                                                                                                        रूपन्देही जिल्लाका सहायक वन अधिकृत गिरीप्रसाद गैरेले सम्पूर्ण काम सकिएकोले सोमबार देखि सो क्षेत्र ५० वटा सिसिटिभी क्यामरा जडान प्राविधिकहरूले गर्ने बताए । बाघ बस्न सक्ने संभावित क्षेत्र, हिंड्डुल गर्ने जैविक मार्ग, आहार गर्ने क्षेत्रलगायतका स्थानको अनुसन्धान गरेको टोलीले जडान गरेका क्यामेराहरू साउन ९ गतेदेखि ३० गतेसम्म रहनेछन् । ती क्यामेराहरू फरक–फरक ठाउँ रहनेछन् भने बीचबीचमा हेर्ने र फेर्ने काम प्राविधिक टोलीले गर्नेछ । शंकरनगर सामुदायिक वन, रामनगर सामुदायिक वन बुटवल, करहिया सामुदायिक वनलगायतका वन क्षेत्रमा बाघको अनुगमन अनुसन्धान सुरु भएको गैरेले बताए । गएको जेठदेखि यता शंकरनगर सामुदायिक वन वरिपरिको क्षेत्रमा वन हेरालु र विभिन्न व्यक्तिहरूले पाटे बाघ विचरण गरेको देखेका थिए । स्थानीयले दुईवटा बच्चासहित पाटे बाघ देखेको बताएका छन् । शंकरनगर सामुदायिक वनका पदाधिकारी, वन प्राविधिक, वन हेरालुहरूले वन क्षेत्रमा गरेको अनुगमनका क्रममा बाघले आक्रमण गरेर मारेका बाच्छाबाच्छी फेला परेको, घाइते अवस्थाका गाई गोरु देखा परेको, बाघ र बाँदरको झडप भएको तथा विभिन्न ठाउँमा बाघका खुट्टाका छाप देखा परेपछि जंगलमा बाघ छ छैन भनेर वन्यजन्तु अनुगमन अनुसन्धानमा शंकरनगर सामुदायिक वनले पत्राचार गरेको थियो ।                                                                                                                                                                                        सामुदायिक वनले पत्रचार गरेको दुई दिनपछि प्राविधिकहरूको टोली शनिबार यहाँ आएको हो । शनिबार र आइतबार विभिन्न चरणमा बसेको बैठक तथा स्थलगत अनुगमनपछि सोमबारदेखि सिसिटिभी क्यामेरा जडान गर्ने तयारी भएको छ । जिल्ला वन कार्यालय रूपन्देहीको नेतृत्व, शंकरनगर, रामनगर र करहिया सामुदायिक वनको सहयोगमा वन्यजन्तु अनुगमन अनुसन्धान टोलीले बाघ विचरण गर्ने क्षेत्र, बाघलाई चाहिने आवश्यक आहारलगायतका विषयमा अनुसन्धान सुरु गरेको रूपन्देहीका सहायक वन अधिकृत गिरिप्रसाद गैरेको भनाइ छ । सामुदायिक वनमा बाघ भए नभएको अनुगमन अनुसन्धान गर्न डब्लुडब्लुएफका वन्यजन्तु अनुसन्धान अधिकृत सविता मल्ल, समुन्द्र सुब्बासहित पाँच जना नागरिक, वैज्ञानिकहरूको टोली खटिएको शंकरनगर सामुदायिक वनका उपाध्यक्ष रविन्द्र बस्नेतले बताए ।                                                                      यस्तै उनीहरूलाई सहयोग गर्न ३ जना वन हेरालु खटिएका छन् । उपाध्यक्ष रविन्द्र बस्नेतले यस क्षेत्रमा बाघ भएको पुष्टि भए खुसीका साथ संरक्षण गर्न सामुदायिक वन तयार रहेको बताए । उनले यस क्षेत्रमा बाघ पाउँदा आफूहरूको ठूलो उपलब्धि हुने बताए । यो टोली बाघ भए नभएको पुष्टि नगरेमा बाघलाई यस क्षेत्रमा रहन दिने या अन्यत्र लैजाने निर्णय पछि वन मन्त्रालयले गर्ने सहायक वन अधिकृत गैरेले बताए ।                                                                                                                                                                                                                                                                                    पछिल्लो एक दशक रूपन्देहीमा सामुदायिक वनहरूको उचित संरक्षण गर्दा विभिन्न वन्यजन्तुहरू फेला परेको जिल्ला वन कार्यालयको तथ्याङ्क रहेको छ । सामुदायिक वन, साझेदारी वन तथा कबुलियत वनको रूपमा वन संरक्षण भएको छ ।