सुन तस्करी प्रकरणमा थप एक चिनियाँ नागरिक पक्राउ

काठमाडौं । साठी  किलो सुन तस्करी प्रकरणमा एक जना प्रमुख व्यक्ति भारतीय प्रहरीको हिरासतमा रहेको खुलेको छ । साउन २ गते काठमाडौंको त्रिभुवन अन्तर्राष्ट्रिय विमानस्थल भन्सार कार्यालयबाट छुटेको ब्रेक शु राजस्व अनुसन्धान विभागले बरामद गरेको थियो ।

जसभित्र ६० किलो ७ सय १६ ग्राम सुन भेटिएको थियो । सुन बरामद भएपछि नेपालबाट भारत भागेका चिनियाँ नागरिक आसिन भनिने पेङ योङसिनलाई भारतीय प्रहरीले पक्राउ गरेको केन्द्रीय अनुसन्धान ब्युरो स्रोतले बताएको छ ।

सुन तस्करीका प्रमुख व्यक्ति मध्ये उनि पर्छन् । उनलाई भारतको सशस्त्र सीमा बल (एसएसबी)ले साउन ३ गते पश्चिम बंगाल सिलिगुढीबाट पक्राउ गरेको थियो । उनलाई एसएसबीले पक्राउ गरी खरिबारी प्रहरीलाई बुझाएको बताइएएको छ । योङसिनमाथि सोधपुछ गर्दा नेपाली नागरिकता देखाएका थिए । तर एसएसबीलाई शंका लागेर चेकजाँच गर्दा उनीबाट चिनियाँ पासपोर्ट र अन्य कागजात बरामद भएको थियो ।

चिनियाँ जासुस हुनसक्ने आशंकामा उनीमाथि अनुसन्धान जारी छ । एक भारतीय अनलाइन मिलिनियम पोष्टले योङसिनले काभ्रे जिल्ला प्रशासनबाट जारी भएको नागरिकता देखाएका थिए। उनीमाथि भारतीय सेनाले समेत अनुसन्धान गरिरहेको उक्त समाचारमा उल्लेख गरेको छ ।

उनीमाथि जारी रहेको अनुसन्धान टुंगो नलागेको सूचना सिआइबीले प्राप्त गरेको छ । चिनियाँ नागरिक भएकाले नेपालमा पठाउने हो वा होइन भन्ने यकिन नभएको पनि सिआइबी स्रोतले बताएको छ ।