हत्याको अभियोगमा महिला वडा सदस्यसहित ४ जना पक्राउ

अस्बिन खड्का
उदयपुर, १६ असार । हत्याको अभियोगमा उदयपुरमा महिला वडा सदस्यसहित ४ जना पक्राउ परेका छन् । पक्राउ पर्नेमा लिम्चुङबुङ गाउँपालिका– ४ बलम्ताका महिला वडा सदस्य जानुका राई, ४२ वर्षीय देवबहादुर राई, सञ्जीव राई र उनकी कान्छी भाउजू ३० वर्षीया बबिता राई रहेका छन् ।

उनीहरुलाई शुक्रवार पक्राउ गरिएको जिल्ला प्रहरी कार्यालय उदयपुरका प्रहरी प्रमुख एसपी नवराज भट्टले जानकारी दिए । उनीहरुले गत जेठ ३१ गने सामान्य विवादमा ६५ वर्षीया जयरानी राईलाई निर्घात कुटपिट गरेका थिए । कुटपिट भएको १४ दिनपछि पीडित जयरानी राईको मृत्यु भएपछि उनीहरुलाई पक्राउ गरिएको प्रहरीले जनाएको छ । एकल महिलासमेत रहेकी मृतक राईलाई कोही नभएको मौका पारेर कुटपिट गरिएको स्थानीयहरु बताउँछन् ।

एक्लै गाउँमा बस्दै आएकी मृतक राईलाई बारम्बार उनीहरुले बिभिन्न बहानामा कुटपिट गर्दै आएको स्थानीयहरुले बताएका छन् । अहिले मृतक राईको शव पोष्टमार्टमको लागि जिल्ला अस्पताल गाईघाटमा राखिएको छ । पक्राउ परेको चारैजनालाई अनुसन्धानका लागि जिल्ला प्रहरी कार्यालय उदयपुरमा राखिएको छ ।