हारिसकेका बामदेवलाई सांसद बनाउन अनिष्टताको संकेत: डा बाबुराम भट्टराई

काठमाडौं, २४ असाेज। नयाँ शक्ति पार्टी नेपालका संयोजक डा बाबुराम भट्टराईले लोकतन्त्रको भ्रष्टिकरण सुरु भएको बताएका छन् । उनले काठमाडौं क्षेत्र नम्बर ७ का सांसद रामवीर मानन्धरलाई राजिनामा गर्न लगाएर बामदेव गौतमलाई चुनावमा लडाउनु खोज्नु राजनीतिक अनिष्टताको संकेत रहेको भन्दै लोकतन्त्रको भ्रष्टिकरण सुरु भएको बताएका हुन् ।

सामाजिक सञ्जाल ट्वीटरमा भट्टराईले हारिसकेका बामदेवलाई सांसद बनाउन खोज्नु लोकतन्त्रको भ्रष्टिकरण भएको भन्दै चरम राजनीतिक अनिष्टताको संकेत भएको दावी गरेका छन् । उनले लेखेका छन् ‘काठमाडौं ७ का निर्वाचित सांसदलाई राजीनामा गराएर बर्दियाबाट हारेका वामदेव गौतमलाई संसदमा पुर्याउन अर्को खर्चिलो चुनाव गराउनु लोकतन्त्रको भ्रष्टीकरण र आगामी दिनमा चरम राजनीतिक अनिष्टताको संकेत हो । बेलैमा होस पुर्याऔं ।’

काठमाण्डौ-७ का निर्वाचित सांसदलाई राजीनामा गराएर बर्दियाबाट हारेका वामदेव गौतमलाई संसदमा पुर्याउन अर्को खर्चिलो चुनाव गराउनु लोकतन्त्रको भ्रष्टीकरण र आगामी दिनमा चरम राजनीतिक अनिष्टताको संकेत हो।वेलैमा होश पुर्याऔं!दलीय घेराभन्दा माथि उठेर लोकतन्त्रको रक्षा र समृद्धीकरण गरौं!

— Baburam Bhattarai (@brb1954) October 10, 2018

गत वर्ष भएको प्रतिनिधि सभाको निर्वाचनमा बर्दिया क्षेत्र नम्बर १ बाट नेपाली काँग्रेससँग हारेका बामदेव गौतमलाई काठमाडौं क्षेत्र नम्बर ७ बाट चुनाव लडाउने तयारी गरिएको छ । क्षेत्र नम्बर ७ काठमाडौंमा उपनिर्वाचन गराएर बामदेवलाई सांसद बनाउनको लागि उक्त क्षेत्रका सांसद रामवीर मानन्धरले राजिनामा दिइसकेका छन् ।