१० लाख बेरुजु देखिएपछि पेट्रोल झिकेर आगो लगाइदिएँ : प्रहरी हवल्दार

काठमाडौं, पुस १३ । आफ्नै मोटरसाइकलबाट २ लिटर पेट्रोल झिकेर सोमबार राति ११ बजे सशस्त्र मुख्यालयको लेखा स्टोरमा आगो लगाएको सशस्त्र प्रहरी हवल्दार रामकृष्ण श्रेष्ठले स्वीकारेका छन् ।
सुरुमा नस्विकारे पनि प्रहरीले लामो केरकार गरेपछि उनले आगलागीको रहस्यबारे प्रहरीलाई बयान दिएका छन् ।

दुई वर्षअघि अख्तियार दुरुपयोग अनुसन्धान आयोगले सामान ढुवानीमा भ्रष्टाचार भएको देखिएपछि छानबिन गरेको थियो । त्यतिखेर दोषी देखिएका एक प्रहरी निरीक्षक, दुई नायब निरीक्षक र एक हवल्दार निलम्बनमा परेका थिए ।

खरिद शाखामा रहेका श्रेष्ठको नाममा समेत करिब १० लाख रुपैयाँ बेरुजु देखिएपछि अख्तियारले डेढ महिनाअघि बयानमा डाकेको थियो । आफ्नै बयान बाझिएपछि अख्तियारले मुद्दा चलाउने तयारी गरिरहेको सुइँको पाएका उनले दुई लिटर पेट्रोल निकालेर लेखा स्टोरमा आगो लगाएको बताएका छन् ।

‘मेरो नाममा १० लाख रुपैयाँ बेरुजु निस्किएपछि कसरी तिर्ने भन्ने डर भयो, बयान दिन जाँदा पक्राउ पर्ने पनि उत्तिकै डर भएकाले कागजपत्र राखिएको स्टोर जलाइदिएको हुँ,’ उनको बयान उद्धृत गर्दै अनुसन्धानमा संलग्न एक प्रहरी अधिकृतले भने ।

सशस्त्र प्रहरी मुख्यालयले अतिरिक्त महानिरीक्षक (एआईजी) प्रेम शाहीको संयोजकत्वमा छानबिन समिति गठन गरेको थियो तर उक्त समितिले ठोस निष्कर्ष बाहिर ल्याएको छैन । महानगरीय प्रहरी अपराध महाशाखाले हवल्दार श्रेष्ठलाई मंगलबार बिहान पक्राउ गरी स्वयम्भू प्रहरी वृत्तको जिम्मा लगाएको छ ।