यसकारण एमाले–माओवादी पार्टी एकता अनिश्चित

काठमाडौं,पुस १४ ।  नेकपा एमाले र माओवादी केन्द्रबीच हुने भनिएको पार्टी एकता अनिश्चित बन्दै गएको छ । चुनाव सकिएलगत्तै पार्टी एकता गर्ने तायारीसहित वामपन्थी मोर्चा बनाएर निर्वाचनमा गएका एमाले–माओवादी एकता संयोजन समितिको बैठक बस्न नसक्दा पार्टी एकता अनिश्चित बनेको हो ।

बुधबार (१२ पुष) मा माओवादी अध्यक्ष पुष्पकमल दाहाल प्रचण्ड र एमाले अध्यक्षबीचको भेटवार्तामा १–२ दिनभित्रै पार्टी एकता संयोजन समितिको बैठक बस्ने निर्णय भएपनि शुक्रबार (आज) सम्म बैठकको मिति तय हुन सकेको छैन ।

दुबै पार्टीका अध्यक्ष आन्तरीक छलफल र समानुपातिकतर्फ प्रदेश सभाका सदस्यहरुको छनोटका लागि व्यस्त भएकाले पार्टी एकता संयोजन समितिको बैठक बस्न ढिलाइ भएको माओवादी केन्द्रका एक नेताले जानकारी दिए । उनका अनुसार संयोजन समितिको बैठक अजपनि हुने सम्भावना कम छ । ‘नेताहरुको व्यस्तता हेर्दा आज एकता संयोजन समितिको बैठक बस्ने सम्भावना कम नै देखिन्छ’ उनले भने, ‘समय निस्क्यो भने भरेसम्म होला । नभए संयोजन समितिको बैठक आज हुने सम्भावना कम छ।’

पद बाँडफाँको विषयमा दुई पार्टीबीच कुरा नमिल्दा एमाले–माओवादी एकतामा ढिलाई भएको हुनसक्ने अनुमान छ ।