१५ अर्बको क्षति! भाटभटेनी समूह ‘जेन–जी आन्दोलन’को हिंसामा सबैभन्दा ठूलो नोक्सानीमा

काठमाडौं — ‘जेन–जी आन्दोलन’का क्रममा तोडफोड र आगजनीको निशानामा परेका भाटभटेनी सुपरमार्केट समूहले १५ अर्ब रुपैयाँभन्दा बढीको क्षति भएको जनाएको छ।

सञ्चालक मीनबहादुर गुरुङका अनुसार भदौ २४ गते देशभरका विभिन्न शाखामा भएको आगलागी, लुटपाट र तोडफोडका कारण यो ठूलो आर्थिक नोक्सानी भएको हो। उनले भने, “भाटभटेनीका २७ शाखामध्ये ६ वटा मात्र आगलागीबाट जोगिएका छन्, तर तीमध्ये पनि धेरै ठाउँमा लुटपाट भएको छ। १२ वटा शाखामा ठूलो मात्रामा लुटपाट, बाँकीमा तोडफोड र चोरी भएका छन्।”

गुरुङले यस घटनालाई “कल्पनाभन्दा बाहिरको विनाश” भन्दै सरकारले छानबिन गरेर दोषीलाई कडा कारबाही गर्न आग्रह गरे। “यदि यस्ता घटनामा कुनै कारबाही भएन भने व्यवसायीहरूको मनोबल गिर्छ,” उनले भने, “आज मसँग यस्तो भयो, भोलि अरूसँग नहोला भन्न सकिँदैन।”

उनका अनुसार दशैं–तिहारअघि भएको यस घटनाले बजार, बैंक र रोजगार सबैमा ठूलो असर पारेको छ। “हामी संघर्ष गरेर यहाँसम्म आएका हौं। भाटभटेनीले हजारौंलाई रोजगारी दिएको छ, बैंकमा अर्बौंको ऋण छ। तर यस्तो अवस्थामा पनि लुटपाट हुँदा कसैले जिम्मेवारी नलिने हो भने देशमा को व्यवसाय गर्ने?”

भाटभटेनीले करिब १० अर्ब रुपैयाँसम्मको बीमा गरेको भए पनि वास्तविक क्षति १५ अर्बभन्दा बढी पुगेको गुरुङको दाबी छ। उनले अन्त्यमा भने, “यो क्षति सोच्नै नसकिने, सपनामा पनि कल्पना नगरेको कुरा हो।”