२०० शैयाको किड्नी अस्पताल बनाउने तयारीमा सुमेरु

ललितपुरको धापाखेलमा रहेको सुमेरु अस्पताल पछिल्लो समय मृगौला रोगको उपचारका लागि भरपर्दो अस्पताल बन्ने क्रममा रहेको छ । मृगौला रोगको उपचारलाई महत्व दिदै अस्पतालमा वरिष्ठ मृगौला रोग विशेषज्ञ प्रा.डा.ऋषीकुमार काफ्लेको नेत्तृत्वमा ३ जना प्रत्यारोपण सर्जन र ५ जना मृगौला रोग विशेषज्ञ रहेका छन् । त्यस्तै अस्पतालमा २५ हेमोडायलोसिस मेशिनमार्फत विरामीलाई डायोलोसिस पनि गराइदै आएको छ ।

यसैवर्ष सरकारबाट मृगौला प्रत्यारोपण स्वीकृति लिए पछि सुमेरुमा गोरखा र रामेछाप निवासी विकास गुरुंग र सुकरानी मोक्तानको पूर्ण निःशुल्करुपमा मृगौला प्रत्यारोपण सफलतापूर्वक सम्पन्न गरिएको विहिबार आयोजित पत्रकार सम्मेलनमा जानकारी दिइयो । सामाजिक उत्तरदायित्व अन्तर्गत २ विपन्न नागरिकको निःशुल्ककरुपमा मृगौला प्रत्यारोपण गराएको अस्पतालले जानकारी दियो ।

अस्पतालले राज्यद्वारा घोषित शुल्कमा डायोलोसिस र एक्युट किड्नी फेलर सम्बन्धी सेवा दिदै आएकोमा अबदेखि देशमा रहेका सबै मृगौला रोगीलाई राज्यले निर्धारण गरेको शुल्क भित्र रहेर प्रत्यारोपण सेवा दिने प्रतिबद्धता पनि जनाएको छ । साथै ब्लड ग्रुप म्याचिंग नहुने विरामीको प्रत्योरोपणका लागि प्लाज्मा फेरोसिस मेशिन जडान र सुविधा सम्पन्न एचएलए ल्याब टेष्ट सुविधा पनि निकट भविष्यमै सञ्चालनमा ल्याउने पत्रकार सम्मेलनमा जानकारी दिइएको छ ।

यसबाहेक अन्तराष्ट्रिय स्तरको सुविधा सम्पन्न २०० शैयाका किड्नी अस्पताल र सबै प्रदेशमा मृगौला रोग सम्बन्धी सेवा केन्द्र स्थापना गर्ने योजन पनि सुमेरु अस्पतालले बनाएको छ । कार्यक्रमका प्रमुख अतिथि स्वास्थ्य तथा जनसंख्या राज्यमन्त्री डा. सुरेन्द्र यादव रहेका थिए ।

https://www.youtube.com/watch?v=zFCPKvnzyMU