२ केजी ६ सय ७० ग्राम सुन मलद्धारमा लुकाएपछि…

मलद्धारमा लुकाएर ठूलो मात्रामा सुन तस्करी गर्न खोज्ने दुई भारतीय नागरिक त्रिभुवन अन्तराष्ट्रिय विमानस्थलमा पक्राउ परेका छन्। विमानस्थल प्रहरी कार्यालयले शनिबार दुई भारतीय नागरिकलाई पक्राउ गरेको हो। दिल्ली घर भएका एन ४६१७९० नम्बर राहदानी बाहक ३१ वर्षिय इम्रान र उत्तर प्रदेश घर भएका जेड ४१७४१०७ नम्बरको राहदानी बाहाक अरिफ अलीलाई प्रहरीले पक्राउ गरेको हो।

उनीहरुबाट २ केजी ६ सय ७० ग्राम सुन बरामद भएको विमानस्थल प्रहरी कार्यालयका प्रवक्ता एसपी दिनेशराज मैनालीले बताए। भन्सारको चेकजाँचमा कर्मचारीहरुले उनीहरुसँग रहेको सुन पत्ता लगाउन सकेनन्। पछि प्रहरीले पक्राउ गरी अनुसन्धान गर्दा सुन भेटिएको हो।थाई एयरबाट बैंकक हुँदै उनीहरु नेपाल आएका थिए।

२ साताअघि पनि मलद्धारमा लुकाएर सुन तस्करी गर्न खोज्ने भारतीयहरु पक्राउ परेका थिए। त्यस्तै, गत साता मुखमा लुकाएर सुन तस्करी गर्न खोज्ने पनि पक्राउ परेका थिए। भारतीयहरुले नेपालको विमानस्थललाई ट्रान्जिट बनाएर सुन तस्करी गरिरहेकाे यिनि घटनाले प्रस्ट्याउदछ।