कर्णाली प्रदेशको दश जिल्लामा दुई लाख मानिस उच्च खाद्य असुरक्षामा

सुर्खेत, १४ पुस । कर्णाली प्रदेशका दुई लाख १५ हजार मानिस उच्च खाद्य असुरक्षामा रहेको एक तथ्यांकले देखाएको छ ।

कर्णाली प्रदेशको खाद्य सुरक्षाको विषयमा कृषि तथा पशुपन्छी विकास मन्त्रालय, विश्व खाद्य कार्यक्रम तथा संयुक्त राष्ट्र संघको कृषि, खाद्य संगठनले संयुक्त रूपमा गरेको सर्वेक्षणअनुसार १० जिल्लाका दुई लाख १५ हजार मानिस उच्च खाद्य असुरक्षामा परेका हुन् ।

केन्द्रीय तथ्यांक विभागले कर्णाली प्रदेशका ३० लाख जनसंख्यामध्ये सात प्रतिशत मानिस उच्च खाद्य असुरक्षामा रहेको जनाएको छ । दैलेख, जाजरकोट, पश्चिम रुकुम, सल्यान, सुर्खेत, डोल्पा, हुम्ला, मुगु, जुम्ला र कालिकोटमा भदौ र असोज महिनामा सर्वेक्षण गरिएको थियो ।

कर्णालीको कुल जनसंख्यामध्ये २८ प्रतिशत मध्यम, अति खाद्य असुरक्षा र सात प्रतिशत उच्च खाद्य असुरक्षामा रहेको सर्वेक्षणले देखाएको छ ।