यसकारण फिल्म रिलिजपछि सार्वजनिक गरियो ‘हजार जुनीसम्म’को यो गीत

काठमाडौं। जनै पूर्णिमाको अवसर पारेर प्रदर्शनमा आएको फिल्म ‘हजार जुनीसम्म’ नयाँ गीत सार्वजनिक गरिएको छ।फिल्म रिलिजको केही दिनपछि ‘सत्य सत्य’बोलको गीत सार्वजनिक गरिएको हो। यो गीतमा अभिनेता आर्यन सिग्देल र अभिनेत्री प्रियंका कार्की फिचर्ड छन्।यसअघि पब्लिसिटीबाट लुकाइएको प्रियंकालाई निर्माण पक्षले यसबाट बाहिर ल्याएको छ। फिल्ममा प्रियंका शिर्ष भूमिकामा छन्। तर निर्माण पक्षले ट्रेलर, पोष्टर लगायतका प्रचार सामाग्रीमा प्रियंकालाई समावेश गरेको थिएन्।

फिल्म नहेरेका दर्शकले गीत सार्वजनिक भएसँगै प्रियंका फिल्ममा रहेको जानकारी पाएका छन् भने फिल्म हेर्न पुगेका दर्शकको लागि प्रियंका सरप्राइजको रुपमा रहेकी छन्।गीतमा मानस थापाको शब्द, प्रविन पौडेलको संगीत र सुगम पोखरेलको स्वर रहेको छ। सार्वजनिक गीतलाई सिक्किमकै हिमाली भेगमा छायांकन गरिएको हो।

आर्यन र प्रियंकाको केमेस्टीलाई गज्जब तरिकाले भिडियोमा उतारिएको छ। यस गीतलाई कथा खुल्ने भन्दै निर्माण पक्षले सार्वजनिक गरेको थिएन। प्रदर्शनरत फिल्ममा दर्शकले आर्यन सिग्देलको कामलाई निकै रुचाएका छन्। उनको गेटअप र अभिनयले दर्शकलाई रुझाएका छन्। स्वस्तिमा खड्का र सलोन बस्नेतले पनि दर्शकलाई बाधेर राख्छन।

‘नाई नभन्नु ल’ सिरिजका निर्देशक विकासराज आचार्यको निर्देशनमा तयार फिल्मलाई प्रेम कथामा आधारित फ्यामिली ड्रामा भनिएको छ। फिल्ममा आर्यन सिग्देल, प्रियंका कार्की, स्वस्तिमा खड्का, संचिता लुइँटेल, शिवहरी पौडेल, अखिलेश प्रधान, संचिता लुइँटेल, अनुभव रेग्मी लगायतको अभिनय छ।

निर्देशक आचार्यले फिल्मको पटकथा सामिप्यराज तिमल्सेनासंगको सहकार्यमा तयार पारेका हुन्। फिल्ममा कविराज गहतराजको नृत्य, उदयराज सोताङ्ग, राजनराज सिवाकोटी, बसन्त सापकोटा र प्रविन पौडेलको संगीत, अर्जुन जिसीको सम्पादन छ। यसमा विशाल चाम्लिङ निर्माता छन् भने कार्यकारी निर्मात्री कविता रेग्मी हुन्।

(Ambien)