आफ्नै घरबाट गाँजा बिक्री गर्ने महिला पक्राउ

अवैध लागुऔषध गाँजासहित एक महिलालाई प्रहरीले पक्राउ गरेको छ । स्याङजाको आँधिखोला गाउँपालिका–४ लप्सिबोटका मिना लामिछानेलाई करिब ५ सय ग्राम अवैध लागूऔषध गाँजा सहित सोमबार बेलुका प्रहरीले पक्राउ गरेको छ ।

मिनाले आफ्नै घरबाट गाँजा बिक्री गरेको सुचनाको आधारमा जिल्ला प्रहरी कार्यालय स्याङजा र प्रहरी चौकी चिलाउनेबासबाट खटिएको प्रहरीले उनको घर तलासी गर्दा उक्त गाँजा सहित फेला पारी पक्राउ गरेको हो । साथै गाँजा किन्न आउने सोही गाउँपालिका–२ मडुवा बस्ने ५ जनालाई समेत प्रहरीले नियन्त्रणमा लिएको जनाएको छ । यस सम्बन्धमा स्थानीय प्रहरीले थप अनुसन्धान गरिरहेको बताएको छ ।

त्यस्तै नवलपरासी गैडाकोट नगरपालिका–१ का १९ वर्षीय सुर्य थापा मगरलाई करिब १ किलो अवैध लागौषध गाँजा सहित सोमबार राति प्रहरीले पक्राउ गरेको हो । मगरले आफ्नै घरमा लागूऔषध गाँजाको कारोवार गरिरहेको गोप्य सुचनाको आधारमा ईलाका प्रहरी कार्यालय गैडाकोटबाट खटिएको प्रहरीले उनको घर तलासी गर्दा लुकाई राखेको अवस्थामा उक्त लागूऔषध गाँजा फेला पारी उनलाई पक्राउ गरेको प्रहरीले जनाएको छ ।