गगन थापाको ठुलो घोषणा: ‘कांग्रेस नेतृत्वको सरकार बनेपछि पहिलो छानबिन देउवाकै हुन्छ’

पोखराको चुनावी सभामा नेपाली कांग्रेसका महामन्त्री गगनकुमार थापाले देशलाई परीक्षणको थलो बनाउन नहुने भन्दै कडा वैचारिक बहस छेडेका छन्। नयाँ शक्ति वा व्यक्तिलाई ‘मौका दिने’ नाममा मुलुकलाई प्रयोगशाला बनाउँदा समय खेर जाने तर्क गर्दै उनले अब सिक्ने र सिकाउने फुर्सद कसैलाई नभएको प्रष्ट पारे। सरकारमा पुग्ने बित्तिकै परिणाम दिन सक्ने परिपक्व टोली आवश्यक रहेको र त्यस्तो तयारी केवल कांग्रेससँग मात्रै रहेको उनको दाबी छ।

आफूले विगत सात वर्षदेखि सरकार सञ्चालनको स्पष्ट खाका तयार पारेको उल्लेख गर्दै थापाले राज्य सत्तालाई योजना विहीन मान्छेको हातमा सुम्पिनु घातक हुने चेतावनी दिए। देश चलाउन एक्लो प्रयास पर्याप्त नहुने र सबै विचार एवं शक्तिलाई समेटेर अघि बढ्ने उदारता कांग्रेसले मात्रै देखाउन सक्ने उनको जिकिर छ। पुराना र नयाँ सबै शक्तिलाई सन्तुलनमा राखेर अघि बढ्ने क्षमता अरु दलमा नरहेको भन्दै उनले बलियो बहुमतको माग गरे।

थापाले सुध्रिएको कांग्रेसको नयाँ संकल्प प्रस्तुत गर्दै भ्रष्टाचार विरुद्ध निर्मम हुने सङ्केत समेत दिएका छन्। आगामी सरकारले शक्तिशाली आयोग बनाएर विगतका हरेक काण्डको निष्पक्ष छानबिन गर्ने अठोट व्यक्त गर्दै उनले त्यसको सुरुवात आफैँ र निवर्तमान सभापति शेरबहादुर देउवाको सम्पत्ति खोजीबाट गरिने घोषणा गरे। आफ्नै नेता वा नाता परे पनि दोषीलाई नछोड्ने उनको दृढता छ।

कानुनी र संस्थागत सुधारमार्फत भविष्यमा हुने अनियमितता रोक्ने योजना सुनाउँदै उनले कांग्रेस विधिको शासनमा अडिग रहने प्रतिबद्धता जनाए। विधिभन्दा बाहिर गएर मनलाग्दी गर्ने छुट कसैलाई नहुने भन्दै उनले कांग्रेसलाई मत दिनुपर्ने ठोस आधारहरु जनतामाझ राखेका छन्।