सुरक्षा संवेदनशीलताका कारण जयनगर–जनकपुर–भङ्गाहा रेल सेवा ठप्प, कर्फ्यु हटेपछि मात्र सञ्चालन हुने

जनकपुरधाममा प्रशासनले लगाएको कर्फ्युका कारण आजदेखि जयनगर–जनकपुर–भङ्गाहा खण्डको रेल सेवा अर्को सूचना नभएसम्म रेल सेवा स्थगित गरिएको छ। जिल्ला प्रशासन कार्यालय धनुषाले सुरक्षा संवेदनशीलतालाई ध्यानमा राख्दै निषेधाज्ञा जारी गरेपछि नेपाल रेल्वे कम्पनी लिमिटेडले आफ्ना सम्पूर्ण सेवाहरू तत्कालका लागि बन्द गर्ने निर्णय गरेको हो।

यात्रुहरूको यात्रुको सुरक्षालाई ध्यानमा राख्दै सेवा स्थगित गरिएको  रेल्वे कम्पनीको केन्द्रीय कार्यालयले जनाएको छ। स्थानीय प्रशासनले अर्को आदेश जारी नगर्दासम्म रेल सेवा सञ्चालन हुने छैन।

रेल्वे प्रशासनका अनुसार कर्फ्युका कारण सिर्जित असहज परिस्थितिका कारण सेवा सञ्चालन प्रभावित भएको कम्पनीले जनाएको छ।
नेपाल रेल्वे कम्पनीका निमित्त प्रशासन प्रमुख अजयकुमार सिंहद्वारा हस्ताक्षरित विज्ञप्तिमा यस आकस्मिक निर्णयबाट आम सर्वसाधारण तथा यात्रु वर्गमा पर्न गएको असुविधाप्रति दुःख व्यक्त गर्नुभएको छ।

प्रमुख जिल्ला अधिकारीको आदेशलाई पूर्ण रूपमा पालन गर्दै कानुनी दायराभित्र रहेर यो सेवा स्थगित गरिएको कम्पनीले प्रष्ट पारेको छ। जनकपुर क्षेत्रमा उत्पन्न सुरक्षा चुनौती र असहज वातावरण पूर्ण रूपमा सामान्य नभएसम्मका लागि यो प्रतिबन्ध कायमै रहनेछ।

स्थानीय अवस्था सुध्रिएर प्रशासनले कर्फ्यु हटाउनासाथ रेल सेवालाई पूर्ववत् रूपमा सञ्चालनमा ल्याइने तयारी रेल्वे विभागको छ। प्रशासनबाट अनुमति प्राप्त भएपछि सेवा पुनः सञ्चालन गरिने कम्पनीले जनाएको छ।