दाङवासी सडकमा : दाङलाई अस्थायी मुकाम नतोके राजमार्ग ठप्प पार्ने चेतावनी

दाङ, २ माघ । प्रदेश नम्बर ५ को राजधानी दाङलाई तोक्न तुलसीपुर उद्योग वाणिज्य संघले जोडदार माग गरेको छ । दाङलाई राजधानी बनाउनका लागि यसअघि महत्वपूर्ण भूमिका र दवाव सिर्जना गर्दै आइरहेको तुलसीपुर उद्योग वाणिज्य संघले सबै स्रोत र साधनका हिसावले उपयुक्त रहेको दाङ जिल्लालाई राजधानी नबनाए जिल्ला र पूर्वपश्चिम राजमार्ग ठप्प पार्ने चेतावनी दिएको छ ।

मंगलवार तुलसीपुर उद्योग वाणिज्य संघका अध्यक्ष वीरबहादुर रावत र महासचिव रुप बहादुर खत्रीले एक प्रेस विज्ञप्ति जारी गरी तत्काल दाङ जिल्लालाई ५ नम्बर प्रदेशको राजधानी घोषणा गर्न आव्हान गरेका छन् । “दाङलाई अस्थायी मुकाम तोकिएन भने ठूलो अन्याय हुनेछ”,संघका अध्यक्ष रावतले भने, “सरकारले आलटाल गरेमा हामी जस्तोसुकै आन्दोलन गर्न पनि तयार छौं ।”

तुलसीपुर उद्योग वाणिज्य संघका निवर्तमान अध्यक्ष विमल रिजालले दाङलाई अस्थायी मुकाम तोक्न नसके जिल्लावासीहरुलाई ठूलो अन्याय हुन्छ भन्दै शान्तिपूर्ण आन्दोलनमा उत्रने चेतावनी दिए । राप्ती अञ्चल सार्वजनिक यातायात व्यवसायी समितिका अध्यक्ष सुरेश हमालले दाङलाई अस्थायी मुकाम नतोकिए पूर्वपश्चिम राजमार्ग ठप्प पार्ने चेतावनी दिए ।

यता जिल्लामा रहेका सम्पूर्ण राजनितिक दल, नागरिक समाज, पत्रकार, संघ संस्था, उद्योगी व्यवसायीहरुको समन्वयमा उद्योग वाणिज्य संघहरुले आन्दोलनको नेतृत्व गर्ने तयारी रहेका छन् ।