दुई घन्टे बैठकपछि मध्यराती भरतपुरमा यसरी च्यातियो मतपत्र

भरतपुर, १५ जेठ– भरतपुर महानगरपालिकाको मत गणना अन्तिम अवस्थामा पुग्दा आइतबार राती माओवादी प्रतिनिधिले मतपत्र च्यातेपछि रोकिएको मत गणना अझै सुचारु हुन सकेको छैन । जसरी पनि जिताउनु पर्ने उद्धेश्यसाथ प्रधानमन्त्री पुत्री रेणु दाहाललाई सत्तारुढ कांग्रेस–माओवादीको मेयर उम्मेदवार बनाइएको भरतपुरमा रेणुले हार्ने स्थिति स्पष्ट देखिएपछि योजनावद्ध रुपमै मतपत्र च्यातिएको खुलासा भएको छ ।

यसरी बन्यो योजना 
कांग्रेसको प्रभाव क्षेत्र मानिएको भतपुर वडा नम्बर १९ को मत गणना सुरु हुनु अघि एमाले उम्मेदवार देवी ज्ञवालीले ८८४ मतले प्रधानमन्त्री पुत्री रेणुलाई लिड गरेका थिए । कांग्रेसको गढ मानिएको वडा नम्बर १९ को २८०० मत गणना गर्दा ३०० मतले माओवादीले लिड गर्ने हिसाव रेणुका प्रतिनिधिहरुले गरिरहेका थिए । तर वडा नम्बर १९ को १८०० मत गणना गर्दा माओवादीले लिड अपेक्षा अनुसार भएन । त्यसबेलासम्म एमाले उम्मेदवार देवी ज्ञवाली र रेणुबीचको मतको अन्तर ७३३ मा झर्यो जुन माओवादीको आकलनसँग मेल खान सकेन । माओवादीले ३०० मत बढी ल्याएर देवीलाई तिर्ने र २० नम्बर वडामा पुग्दा केही मत आफूल्े बढी ल्याएर एकसय भन्दा कम मतले जित्ने हिसाव गरेको थियो ।

माओवादीको दुई घन्टे बैठक 
वडा नम्बर १९ को १८०० मत गणनाको नतिजाले माओवादीका प्रतिनिधि केही अत्तालिंदै थिए । त्यसैले उनीहरुले सिल खोल्न बाँकी अर्काे मतपेटिका खोल्नुअघि ब्रेक लिएर खाना खाने प्रस्ताव राखे । प्रमुख निर्वाचन अधिकृत कविप्रसाद न्यौपानेले खानाका लागि मत गणना ब्रेक गर्ने प्रस्ताव राखे । सबै दलका प्रतिनिधिले खाना खाए । खाना खाएर मत गणना सुरु गर्न खोज्दा माओवादीका प्रतिनिधिहरु हराए । उनीहरुलाई दुई घन्टासम्म पर्खिंदा पनि नआएपछि त्यहाँबाट टेलिफोन गरियो । आफूहरु जरुरी बैठकमा रहेकाले केही समय लागेको उनीहरुले वताए । माओवादीका अन्य नेताहरु सहित भएको सोही बैठकले भरतपुरमा जित्ने स्थिति नरहेकाले मतपत्र च्यात्ने योजना बनाएको थियो । त्यसका लागि बाहिर पनि शत्तिः परिचालन गर्नु पर्ने, सुरक्षाकर्मीलाई आदेश गराउनु पर्ने र मतगणना अधिकृतलाई चुप बस्न भन्नु पर्ने सल्लाह भएको खुलेको छ ।

करिव अढाई घन्टापछि माओवादीका आधिकारिक प्रतिनिधि तोकिएका द्रोण सिवाकोटी र वाइसीएल जिल्ला इन्चार्ज मधु न्यौपाने मतगणनास्थलमा आए । उनीहरु भेला भएपछि वडा नम्बर १९ को गणना बाँकी मतपेटिका खोलियो । मतपेटिका खोलेर मतपत्रहरु सर्टिङ गर्ने क्रम चलिरहेको थियो । सर्टिङ गर्दा प्यानलै एउटै चिन्हमा लागेका मतपत्र एकातिर र क्रस भोटिङका मतपत्रहरु अर्कातिर खात लगाएर राखियो । उक्त बाकस खोलेर मतपत्र सर्टिङ गर्दा एमालेको प्यानललाई नै परेका मतपत्रको संख्या ज्यादा देखियो । त्यहीँ सँगै रहेका वाइसीएल जिल्ला इन्चार्ज त्यसबेला निकै छट्पटाउन थाले । उनले टाउको समाएर केही बर्बराएको प्रत्यक्षदर्शीले वताए । त्यसपछि उनी बसेको ठाउँबाट जुरुक्क उठे र भने– ‘यी मतपत्रहरु मैले हेर्न सकिनँ ।’ त्यहाँ रहेका एमालेका प्रतिनिधिहरु चनाखो हुन थाले । त्यतिकैमा वाइसीएल इन्चार्ज न्यौपाने र माओवादीका गणना प्रतिनिधि द्रोण सिवाकोटीले सातै छाप सूर्यमा लगाइएका मतपत्र तानेर च्यात्न थाले ।

स्रोतका अनुसार सर्टिङ गरिएका मतपत्र गणना गर्दा १९ नम्बर वडामा एमालेको अग्रता बढ्ने देखिएको थियो । ७३३ को मात्र अन्तरमा झरेका देवी ज्ञवालीले ती मत सबै गन्दा मत अन्तर बढाएर ८८३ पु्याउने आकडा माओवादी प्रतिनिधिले निकाले । किनभने एमालेको सूर्यमा सातवटै छाप लागेका करिव १५० मतपत्रको चाङ त्यहाँ देखिएको थियो । त्यही आधारमा हिसाव निकाल्दा वडा अध्यक्षमा पनि एमालेले नै प्यानल नै जित्ने आकडा निकालियो । त्यही बुझेपछि माओवादीका प्रतिनिधिले मतपत्र च्यातेका थिए ।

मतगणना अधिकारीलाई पिसाव लाग्यो 
वाइसीएल इन्चार्ज न्यौपाने मतपत्र हेर्नै सकिनँ भनेर बसेको ठाउँबाट उठेपछि मत गणना अधिकृत कविप्रसाद न्यौपाने पिसाव लाग्यो भन्दै ट्वाइलेट गए । उता मतपत्र च्यात्ने माओवादी प्रतिनिधि दुई जना प्रतिनिधि न्यौपाने र सिवाकोटी गणनास्थलबाट बाहिर निस्के । भित्र मतपत्र च्यातिएको हल्ला बाहिर फैलिइसकेको थियो । उनीहरु बाहिर निस्केको थाहा पाएपछि एमाले कार्यकर्ता गंगा लामाले किन मतपत्र च्यातेका भन्दै उनीहरुमाथि हातपात गर्न खोजे । तर, प्रहरीले माओवादीका ती दुवै प्रतिनिधि र गणनास्थल बाहिर रहेका एमाले कार्यकर्ता गंगा लामा तिनै जनालाई पक्राऊ गर्यो ।

निर्वाचन आयोगलाई रिपोर्ट
माओवादीले मतपत्र च्यातेपछि निर्वाचन अधिकृत न्यौपानेले त्यहाँ भएको सम्पूर्ण घटनाको रिपोर्ट निर्वाचन आयोगलाई पठाउने र आयोगबाट के निर्देशन हुन्छ त्यही आधारमा गणना अघि बढाउने भनेपछि अहिलेसम्म त्यहाँ मतगणना भएको छैन । घटनाका विषयमा आफ्नो धारणा राख्न एमाले चितवनले अहिले ९ बजे पत्रकार सम्मेलन आयोजना गरेको छ ।

सिराहाको सम्झना 
भरतपुरमा राज्यशक्ति दुरुपयोग गरी प्रधानमन्त्री पुत्रीलाई जिताउने जति प्रयास गरे पनि मतदाताले सो अनुसारको मत नदिएपछि मतपत्र च्यात्ने काम गरेर माओवादीले ४ वर्ष अघिको संविधानसभा चुनावमा सिराहामा भएको घटना दोहोर्याएको छ । काठमाडौं १० र सिराहा ५ बाट चुनाव लडेका माओवादी अध्यक्ष पुष्पकमल दाहाल काठमाडौंबाट चुनाव हारिसकेका थिए । सिराहा ५ मा पनि उनी एमाले उम्मेदवार लिला श्रेष्ठ भन्दा करिव ८ सय मतले पछि परिरहेका थिए । त्यसबेला ५ घन्टा मत गणना रोकेर अचानक बत्ती गएको बाहना बनाएर दाहाल विजयी भएको घोषणा गरिएको थियो । अहिले दाहालकी पुत्री रेणु भरतपुरको मेयरकी उम्मेदवार छिन् । उनलाई चुनाव जिताउन कांग्रेसका मेयर उम्मेदवारको उम्मेदवारी कांग्रेस सभापति शेरबहादुर देउवाले जबर्जस्ती फिर्ता लिएका थिए भने देउवा र प्रधानमन्त्री दाहाल निर्वाचन आचार संहिता विपरित रेणुको चुनाव सभामा सम्बोधन गर्न पुगेका थिए । यतिले मात्र नपुगेर मन्त्रीपषिदले ब्याकडेटको निर्णय गरी भरतपुरको निर्वाचनका लागि करोडौं रकम निकासा गरी मतदाता प्रभावित पार्न पैसा बाँडिएको थियो ।