पूर्व क्रिकेट कप्तान इमरानले लिए पाकिस्तानी प्रधानमन्त्रीको शपथ

काठमाडौं, २ भदौ । क्रिकेटबाट विश्वविजेता पूर्व क्रिकेट कप्तान इमरान खानले आज पाकिस्तानको प्रधानमन्त्रीको शपथ लिएका छन् । उनी शुक्रवार प्रधानमन्त्रीमा निर्वाचित भएका हुन् ।

पाकिस्तान तेहरिक–ए–इनसाफ (पीटिआई) का अध्यक्ष रहेका खान पाकिस्तानको २२ औँ प्रधानमन्त्री बनेका हुन् । ६५ वर्षीय खानको शपथ समारोहमा प्रधानमन्त्री पत्नी बुश्र, राजनीतिज्ञ तथा सैनिक उच्च अधिकारीहरुको उपस्थिति रहेको थियो । राष्ट्रिय सभाका प्रवक्ता असद क्वाइसरले मत गणनापछि प्रधानमन्त्रीको नाम घोषणा गरेका हुन् । राष्ट्रिय सभामा भएको मतदानमा खानले १७६ मत प्राप्त गरेका थिए । उनका प्रतिस्पर्धी पाकिस्तान मुस्लिम लिग नवाजका शेहबाज शरिफले ९६ मत पाए ।

नवनिर्वाचित प्रधानमन्त्री इमरानको पार्टी पीटिआईले जुलाईमा भएको निर्वाचनमा सबैभन्दा धेरै सिट जितेको थियो । आफै पार्टी स्थापना गरेको दुई दशकपछि साना पार्टीहरुको सहयोगमा सन् १९९२ को विश्वकप क्रिकेट विजेता इमरान खान प्रधानमन्त्री बनेका हुन् ।