आमा महिनावारी भएकोबेला (कबिता)

✍ अन्जना इछमफूल

प्रत्येक अठ्ठाइस दिनमा
बुवा चुल्होमा उभिएर
घिउमा ज्वानो फुराएर रक्सी झान्ने गर्नुहुन्थ्यो ।
तातो तेलले आमाको गोडा मालिस गरिदिनुहुन्थ्यो ।
पलेटी कसेर मजाले ढिँडो मस्काउनुहुन्थ्यो !
आमा अगेना छेउमा बसेर भुङ्ग्रोमा
पालैपालो पाइताला र ढाँड सेकाइरहेकि हुन्थिन ।
चार दिनको लागि आमा
केटाकेटी या पाहुना, यस्तै बनेर
हामीसङ्गै बसेर कपाकप माम खान्थिन !!
त्योबेला– पधेँराबाट
ठूलो तामाको गाग्रीमा पानी पनि
अक्सर बाबालेनै ओसार्नुहुन्थ्यो ।

अनि मलाइ लाग्थ्यो
आमा सधैं महिनावारी भैरहुन !!
किनकी म आमासङ्ग लेपासिएर
बाबाले पकाएको तातो ढिँडोको गाँस
कुप्लुक कुप्लुक निल्न पाउँ ।
आफुले टोक्न नसकेको गुन्द्रुकको त्यान्द्रो
मासुको छाला र हड्डि,
सुटुक्क
आमाको बटुकोमा हालिदिन पाउँ ।
खादाँखादैको बाँकि सानो
ढिँडोको डल्लो पनि
आमाकै ढिडोमाथी स्तुपाको आकार बनाएर छोडिदिउँ ।
अनि शान्ति र स्निग्ध
एकजोडी बुद्धको आँखाहरु ढिँडोकै बनाइदिउँ  !!
र ठुली भएपछि ती आखाहरुलाइ बोकेर
बिश्वभ्रमणमा निस्कुँ ‘।
आमाजस्तै महिनावारी भएकी महिलाहरुको
महिनावारी दिवशको सुखसयल हेरुँ !!

त्यो बेला मलाइ थाहा थिएन कि

एकदिन मलाइ पनि महिनावारी हुनेछ ‘।

र यो पनि थाहा थिएन कि,

मेरि आमा जस्तै थुप्रै आमाहरुको लागि
छाउगोठ पनि बनाइएको छ यो देशभित्र  !
पाँच दिनसम्म आमाको हातको पानी बारिन्छ
यहीँ देशमा ।
र यसैको विरुद्ध मेरि आमाजस्तै आमाहरुले
आवाज उठाइरहेका छन ‘ यहीँ देशभित्र  !!

जब मैले यी सब आफ्नै आँखाले देखेँ ‘।
तब मैले बुद्धको आँखा लिएर बिश्व
भ्रमण गर्ने मेरो योजना रद्द गरेँ  !!