राजीनामा नदिए जनकारवाही गर्ने विप्लव माओवादीको धम्की

काठमाडौं, २१ जेठ । नेत्रविक्रम चन्द “विप्लव”ले नेतृत्व गरेको नेपाल कम्युनिष्ट पार्टीले गठन गरेको जनपरिषद्ले प्यूठानको झिमरुक गाउँपालिकाका अध्यक्ष तिलक जीसीलाई राजीनामा दिन भन्दै अल्टिमेटम दिएको छ । जनपरिषद्को प्यूठान जिल्ला समितिले अध्यक्ष जीसीको नाममा पत्र काटेर राजीनामा दिन भनेको हो ।

अध्यक्ष जीसीका नाममा जनपरिषद् नेपाल प्यूठान जिल्ला समितिका प्रमुखले हस्ताक्षर गरेको अल्टिमेटममा भनिएको छ, “राज्यको ढुकुटी कसरी रित्याउने भन्ने होडबाजीमा कथित जनप्रतिनिधिहरु प्रतिष्पर्धामा छन् । यो दलाल सत्ताले जनतामा ल्याएको महंगी र करको भरमा यिनको सत्ता टिक्न र अब जनताले पाल्न सक्दैन भन्ने कुरा प्रष्ट छ ।” अल्टिमेटममा जीसीलाई पनि दलाल सत्ताको कथित जनप्रतिनिधि भन्दै राजीनामा दिन भनिएको छ र राजीनामा नदिए जनकारवाहीको चेतावनी समेत दिइएको छ ।